Ministru Defeza, Filomeno da Paixão de Jesus. Imajen TATOLI/Francisco Sony

DILI, 08 fevereiru 2022 (TATOLI)–Governu liuhosi Ministériu Defeza (MD) prepara ona membru FALINTIL-Forsa Defeza Timor-Leste (F-FDTL) hodi jere rasik ró partullamentu rua ne’ebé hetan apoia hosi Governu Austrália mai Timor-Leste, ne’ebé sei to’o iha juñu 2023.

“Kona-ba doasaun ró patrullamentu rua, ita haruka forsa hamutuk na’in-60 bá Austrália atu aprende jere, sira sei hasai kursu oioin iha área manutensaun, lojístika, eletrisidade, mákina no área seluk. Sira ne’e ba Austrália desde tinan 2019 to’o agora, sira ba kada grupu no iha tinan 2022 sei haruka sira ba hamutuk fali hodi hasai kursu hamutuk iha ró ne’e, nune’e iha tinan 2023 prontu ona simu ró,” Ministru Defeza, Filomeno da Paixão de Jesus, relata hafoin hasoru malu ho Primeiru-Ministru, Taur Matan Ruak, iha Rezidénsia Farol, tersa ne’e.

Notísia relevante: TL-Austrália iha Faze Diskusaun ba Patrullamentu Konjunta Kosta Súl

Tanba ne’e, governante ne’e informa ba Xefe Governu kona-ba dezenvolvimentu ne’ebé la’o iha Defeza no F-FDTL, liliu parte Navál.

Maski nune’e, konstrusaun portu navál rasik atraza no labele finaliza iha tinan 2023 tanba impaktu pandemia,maibé daudaun ne’e finaliza ona aterru.

“Ha’u ho Primeiru-Ministru ko’alia kona-ba Portu Hera ne’ebé liuhosi kooperasaun Austrália ajuda ita barak, ne’e refere mós konstrusaun portu ne’e. Oras ne’e halo ona aterru ba fatin ne’ebé halo portu. Portu ne’e atraza nune’e sei la ramata iha tinan 2023, maibé posivelmente iha tinan 2024, atraza ne’e ho motivu COVID-19, nune’e deslokasaun bá-mai halo estudu ba portu ne’e dada oituan,” Ministru esplika.

Maski nune’e, tanba Portu Tibar sei ramata iha juñu tinan ne’e, nune’e deslokasaun portu komersiál (Dili) bá Tibar iha espasu atubele akomoda ró rua mai hosi Austrália.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here