Membru PNTL sira hala'o patrullamentu la'o-ain hodi asegura seguransa ba komunidade sira iha area Manleuana.Imajen Tatoli/Antonio 'Dasiparu'

DILI, 08 fevreiru 2022 (TATOLI)— Polísia Nasionál Timor-Leste (PNTL) munisípiu Dili hahú implementa operasaun la’o ain atu garante seguransa ba komunidade sira iha kapitál nasaun ne’e.

Operasaun ho tipu la’o-ain tama no sai bairru-risku sira iha tempu kalan hodi garante situsaun ida hakmatek ba komunidade.

Komandante PNTL munisípiu Dili, Superientendente Xefe Polisia, Henrique da Costa. Imajen TATOLI/Francisco Sony

“Ita hosi Komandu PNTL Munisípiu Dili ho Unidade Espesiál Polísia (UEP) no Polísia Task Force halo atividade patrolla ka operasaun la’o-ain, ho mós ho karreta ho objetivu atu asegura segurasa iha tempu kalan. Nune’e komunidade bele sente seguru no hakmatek iha sira nia movimentu,” Komandante PNTL Munisípiu Dili, Superintendente Xefe, Henrique da Costa, hateten ba jornalista sira iha iha Komandu PNTL Dili, tersa ne’e.

Komandu munisípiu Dili deside ona intesifika operasaun la’o ain atubele prevene konflitu iha área risku.  

Nune’e, medida prevensaun ne’e envolve diretamente hosi Polisia Eskuadra sira, Forsa Rezerva (Polisia Task Force), Unidade Espesial Polisia (UEP), Unidade Polisia Maritma (UPM) no Unidade Patroliamentu Fronteira (UPF).

Operasaun ne’e envolve mós hosi parte servisu sekreta sira, kompostu hosi Servisu Informasaun Polísia Munisípiu Dili, Servisu Informasaun Polísia Kriminál no Servisu Nasionál Intelejénsia J2.

“Ita mos identifika área ne’ebe mak risku liu ba iha konflitu, maka Dom-Aleixo hanesan iha Delta, Bairru-Pite, área Vera-Cruz nian mak Villa Verde, Metinaro, Cristo-Rei, ne’ebé sempre mosu problema no ita sempre halo atividade patrulla atu komunidade sente seguru,” nia akresenta.

Nune’e, Komandante PNTL ne’e dehan planeia atu konvida autoridade lokál sira hodi koordena hamutuk asegura seguransa iha kapitál Dili.

Komandante Henrique mós rekoñese katak ikus-ikus ne’e problema ka konfrontu mosu iha kapitál Dili tanba envolvimentu Grupu Arte Marsiál no Grupu Arte Rituál.

“Ita haree kazu konfrontu iha área Maslidu-Tasi-Tolu ne’ebé hosi ami nian identifika envolve Grupu Arte Marsiál no Grupu Rituál balun, maibé Komandante Jerál PNTL iha semana kotuk bolu ona sira nian dirijente hodi fó xamada ba sira,”nia afirma

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here