Fundasaun Alola hamutuk ho Grupu Traballu ba Kombate Tráfiku Umanu (GT-KTU) disemina informasaun kona-ba "Prevensaun no Luta Kontra Tráfiku Umanu” ba autoridade lokál sira iha Dili. Imajen/Mídia Fundasaun Alola.

DILI, 08 fevereiru 2022 (TATOLI)—Fundasaun Alola liuhusi programa advokásia servisu hamutuk ho Grupu Traballu ba Kombate Tráfiku Umanu (GT-KTU), tersa ne’e, realiza enkontru ida ho autoridade lokál ho objetivu prinsipál atu disemina informasaun kona-ba “Prevensaun no Luta Kontra Tráfiku Umanu” no Lei númeru 03/2017 iha Munisipiu Dili.

Iha enkontru ne’e ema hamutuk 30 mak partisipa iha atividade dizsminasaun ne’e kompostu husi administradór postu, xefe suku, delegada, membru konsellu suku, xefe aldeia no seluk seluk tan, atu nune’e depois situasaun hanesan mosu iha sira-nia área, sira iha kbiit atu halo atuasaun.

Diretora Diresaun Jestaun Merkadu no Turismu Munisípiu Dili (DGMT-MD), Justina Amaral, husu ba líder komunitária sira atu bele aproveita didi’ak enkontru ne’e hodi bele hatene kle’an kona-ba Tráfiku Umanu tanba hahú sai buras iha mundu krime hafoin negósiu droga.

“Dili hanesan kapitál, sentru ba buat hotu-hotu, sentru ba edukasaun, sentru ba komérsiu ninian, sentru ba saúde, entaun problema barak mak mosu inklui liga mós ho tráfiku umanu no dalaruma ita la hatene oinsá atua problema sira-ne’e. Tanba ne’e, ohin opurtunidade di’ak ida, ita-nia maluk husi Fundasaun Alola hakarak fahe informasaun, ne’e opurtunidade di’ak,” Justina Amaral hateten liuhosi komunikadu imprensa ne’ebé Agência Tatoli asesu, tersa ne’e.

Nia dehan, importante tebes atu autoridade lokál sira hatene lalaok ka prevensaun ba tráfiku umanu inklui lei ba prevensaun.

Fundasaun Alola bele haforte sistema judisiál, sai guarda atu garantia katak sidadaun la bele tan sai vítima bebeik husi explorasaun sira-ne’e tanba lei ida-ne’e sai mós instrumentu legál ba autór justisa sira hodi prosesu autór internasionál sira-ne’ebé durante ne’e hetan lukru husi explorasaun obrigatóriu ema seluk nian, tan tráfiku umanu atividade ida violasaun direitu umanu ne’ebé sai ona preokupasaun ba nasaun no sai ameasa ida ba feto maluk sira.

Promulgasaun Lei Nú. 3/2017 kona-ba Prevensaun no Kombate Tráfiku ema nian hosi Prezidente Repúblika sai instrumentu 3/2017, definisaun trafiku umanu hanesan rekrutamentu, transportasaun, transfere, hasubar ka simu ema, ho meiu oioin hanesan ameasa ka uza forsa, usa maneira seluk ho obriga, lori halai, no habosok, hosi abuza forsa ka pozisaun hosi vulneravel sira ka hodi fó no simu pagamentu ka benefísiu hodi hetan konsente hosi ema atu kontrola ba ema seluk ba propózitu exploitasaun.

Exploitasaun inklui, ba mínimu, exploitasaun ba prostitusaun ka seluk-seluk ka forma hosi sexuál exploitasaun, haforsa ba servisu ka knaar, sai atan ka práktika ne’ebé atu hanesan ho atan, sai nu’udar atan ka haketak órgaun.

Atu bele hamenus atividade krimr da-ne’e la’ós fasil no presiza kolaborasaun sevisu ne’ebé integradu entre parte hotu, la’ós de’it fó todan ba Polísia ka ministériu relevente, maibé presiza tau atensaun ida-ne’e hanesan responsibilidade ema hotu nian hodi salva nasaun ne’e hosi krimi organizadu.

Fundasaun Alola eziste durante tinan 17 ona ne’ebé mak liuhosi servisu hamutuk Grupu Trabalho ba Kombate Tráfiku Umanu (GT-KTU) nu’udar liña koordenasaun entre instituisaun relevante hodi kombate problema Tráfiku Umanu iha rai-laran nomós no sai ponte importante ida atu bele fasilita feto vítima sira hetan asisténsia.

GT-KTU estabelese iha tinan 2008 no sai ponte ida atu haforsa liután liña kordenasaun entre instituisaun relevante iha rai-laran no sai ponte importante ida atu bele fasilita feto vitima sira hetan asisténsia.

Dezde 2010, grupu ne’e kontribui barak ba esbosu Lei Kombate Trafiku Umanu atu bele sai lei ne’ebe forte no ikus iha fulan April 2015, Konselhu Ministru aprova esbosu Lei Kombate Trafiku Umanu no agora promulga ona.

Eksistensia GT-KTU sei sai meiu importante hodi haforte instrumentu legál hirak ne’ebé Governu no Estadu Timor-Leste aprova no ratifika ona hanesan Lei Nú.3/2017 Prevensaun Luta Kontra Tráfiku Umanu’, Kódigu Penal Timor-Leste, Konvensaun CEDAW, Konvensaun Labarik, Konvensaun Protesaun ba Direitu Traballadór Imigrante no enkuadramentu legal seluk tan ne’ebé relasiona ho asuntu Tráfiku Umanu.

Mesmu lei refere hetan ona promulgasaun maibé Grupu Traballu ba Kombate Tráfiku Umanu (GT-KTU) nafatin ezije ba órgaun kompentente sira hotu atu iha vontande di’ak hodi asegura ba implementasaun tanba Timor-Leste nu’udar país destinadutáriu ba tráfiku umanu hosi rai seluk iha rejiaun ne’e.

Iha vítima barak mak hetan esperiénsia ba esplorasaun, hanesan prostituisaun seksuál, empregada doméstika, feto traballdór, feto no labarik sira husi área rurál ba sidade hodi hetan esplorasaun seksuál, inklui trafiku ba rai seluk, rekonese katak sidadaun timor-oan sai vulneravel tebes ba kazu tráfiku umanu.

Iha relatóriu Global Estadus Unidus hatudu katak estimasaun ema miliaun 27 mak sai vítima tráfiku iha mundu tomak kada tinan, persentajen aas liuhusi vítima hirak-ne’e mak feto no labarik no metade hosi vítima sira-ne’e mai hosi Ázia no Pasífiku.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here