Diretór Hospital Referál Maliana, Bourdaloue Fernandes Moniz. Imajen Tatoli/Sérgio da Cruz.

BOBONARO, 08 fevereiru 2022 (TATOLI) – Hospital Referál Maliana (HRM), munisípiu Bobonaro deteta médiku na’in-rua no estudante medisina husi Universidade Nasionál Timor Lorosa’e (UNTL) na’in-hitu konfirmadu pozitivu Covid-19.

Diretór HRM, Bourdaloue Fernandez Moniz, informa, pasiente hirak-ne’e kompostu hosi estudante estajiadu na’in-hitu ne’e ekipa vijilánsia sentinela deteta iha semana kotuk, liuhosi aktividade Rapidt Test, balu mai ho síntoma dengue no asintomátiku, enkuantu doutór na’in-rua ne’e deteta hafoin halo Contact Treacing iha loron rua liubá.

“Estudante na’in-hitu kala mai hosi Dili mak kona, entaun ita halo teste ba grupu ne’e, nune’e rezultadu PCR hatudu sira na’in-hitu mak pozitivu, inklui médiku na’in-rua ne’ebé sai profesór ba sira-ne’e mós pozitivu hotu, ida kona iha loron hira liubá no ida kona horisehik,” nia ko’alia iha Maliana, tersa ne’e.

Nia hatutan, daudaun ne’e estudante medisina na’in-hitu kumpre hela iha sala izolamentu Hospital Referál Maliana, no médiku na’in-rua ne’e hala’o hela auto-izolamentu iha sira-nia rezidénsia.

“Sira-ne’e tama ona izolamentu loron lima ona, maibé jeralmente sira-ne’e ninia kondisaun mós di’ak, aban ita halo teste,” nia katak.

Nia apela ba komunidade iha postu administrativu Maliana, atu nafatin kumpre regra prevensaun Covid-19 ne’ebé Organizasaun Mundiál Saúde (OMS) fo-sai ona katak, bainhira sai ba fatin públiku tenke uza máskara, fase-liman beibeik ho sabaun no kontinua prátika distansiamentu sosiál.

Jornalista         : Sergio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here