Ditetora Servisu saúde Munisípiu Covalima, Maria de Fátima Moniz. Imajen Tatoli/Celestina Teles.

COVALIMA, 08 fevereiru 2022 (TATOLI)–Diretora Servisu Saúde Munisípiu Covalima, Maria de Fatima Moniz informa, iha loron hitu fulan-fevereiru, servisu saúde munisípiu Covalima rejista kazu dengue 72 no hosi númeru ne’e na’in-tolu (3) mate.

“Iha loron 07 fulan-fevreiru tinan ne’e, ita rejista kazu dengue 72 ba labarik sira ho idade tinan 10 mai kraik no mate na’in-tolu (3),” Diretora Servisu Saúde Munisípiu Covalima Maria de  Fatima  Moniz hateten ba Agência Tatoli, hafoin partisipa serimónia toma pose ba administradór foun na’in-lima iha salaun administrasaun Covalima, tersa ne’e.

Tanba ne’e, servisu saúde Munisípiu Covalima esforsu halo fumigasaun iha área sira-ne’ebé afetadu hodi servisu hamutuk ho autoridade lokál hodi halo limpeza jerál, liu-liu iha fatin públiku sira hanesan merkadu, estrada públiku hodi hamenus susuk ne’ebé mak lori moras dengue ba labarik sira. 

Tuir dadus, hosi servisu saúde munisípiu Covalima rejista kazu dengue, labarik sira-ne’e ho idade 10 ba kraik, ne’ebé rejista kazu dengue maiória hosi postu administrativu Suai Vila, Maucatar no Tilomar.

Atu atende ba kazu refere, médiku sira sufisiente maibé problema ne’ebé durante ne’e hasoru mak komunidade mai tarde atu asesu fasilidade saúde, falta kuñesimentu ba sintóma hosi moras dengue.

Sintóma hosi moras dengue mak hanesan isin-manas makaas, malirin bee-doko, muta no bainhira grave liu mak mosu sinál kafuak mean-mean iha liman no akontese himorogia iha ibun no inus.

Daudaune ne’e, pesoál saúde halo esforsu hodi halo sensibilizasaun hodi fó sai avizu iha bairru sira-ne’ebé mak afetadu ba kazu dengue, hodi halo intervensaun liuhosi fumigasaun ba ba área sira-ne’ebé mak afetadu dengue. 

Tuir planu, iha loron 10 fulan-fevereiru ne’e, servisu saúde munisípiu Covalima hamutuk Centru Comunidade Covalima (CCC) sei halo limpeza jeral iha fatin públiku sira, nune’e bele prevene no kombate dengue iha Covalima.

Tuir dadus hosi Ministériu Saúde fó iha loron 07 fevereiru ne’e kazu dengue hamutuk 1705 no kumulativu óbitu na’in 28. Maioria kazu ne’e deteta hosi munisípiu Dili ho total kazu 1117, Manatuto ho kazu 120, Ermera ho kazu 77, Baucau ho kazu 78, Manufahi ho kazu 70, Covalima ho kazu 63, Liquiça kazu 32, Bobonaro ho kazu 26, Viqueque 28, Lautém ho kazu 35, Aileu ho kazu 33, Ainaro kazu 23 no RAEOA ho kazu tolu (3).

Jornalista : Celestina Teles                                   

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here