Diretór Jerál STAE, Acilino Manuel Branco. Imajen TATOLI/Egas Cristóvão

DILI, 07 fevereiru 2022 (TATOLI)—Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, informa STAE simu ona pedidu hosi g7+ no parte hosi korrespondénsia Ásia nian atu sai observadór hodi halo observasaun ba prosesu tomak eleisaun prezidensiál 2022.

“Ita foin simu korrespondénsia hosi Azia nian ne’ebé hato’o pedidu mak iha STAE no parte téknika no jurídiku STAE halo hela prosesu atu oinsá sira bele hetan akredissaun. Nune’e mós hosi G7+ ne’ebé aprezenta ona sira-nia pedidu atu sai observadór ba prosesu eleisaun prezidensiál,” Diretór Jerál STAE ne’e informa ba Agência TATOLI, iha nia knaar fatin Caicoli, Dili, segunda ne’e.

STAE mós simu ona kontaktu balun hosi membru CPLP nian maibé ida-ne’e komunika liuhosi Ministériu Negósiu Estrajeiru no Kooperasaun (MNEK) no mós embaixada korpu diplomata iha rai-laran, maibé sira-nia estatutu tenke esplika iha pedidu ne’e kona-ba observasaun nian.

Iha rai-laran, STAE mós simu ona no halo hela verifikasaun ba pedidu hosi Provedoria Direitu Uamun no Justisa (PDHJ, sigla portugés) atu halo monitorizasaun ba prosesu eleisaun prezidensiál ba Prezidente repúblika ne’ebé sei hala’o iha 19 marsu 2022.

“Ba monitorizasaun ninian, ami simu ona pedidu hosi Provedoria Direitu Umanu no Justisa nian no oras ne’e ita-nia téknika no jurídiku STAE verifika hela,” Diretór Jerál STAE ne’e hateten.

Entretantu kona-ba observadór nasionál, nia hateten, STAE haruka ona karta ba FONGTIL maibé to’o agora seidauk iha resposta hosi organizasaun ne’ebé sai mahon ba organizasaun naun governamentál sira seluk ne’e.

“Ita espera nia bele mobiliza no informa para depois hato’o pedidu ba STAE, maibé to’o agora ita seidauk hetan resposta hosi FONGTIL. Maibé antes ne’e ita hetan ona pedidu hosi Fundasaun Mahein (FM),” nia dehan.

Notísia Relevante: STAE simu ona pedidu hosi Uniaun Europea atu sai observadór

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here