Prezidente Parlamentu Nasionál, Deputadu Aniceto Longuinhos Guterres Lopes, lansa portál konstituisaun hanaran crdtl20anos.parlmento.tl komemora tinan 20 konstituisaun Repúblika Demokrátika Timor-Leste (RTDL). Imajen Tatoli/Nelson de Sousa.

DILI, 07 fevereiru 2022 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, segunda ne’e lansa portál konstituisaun hanaran crdtl20anos.parlmento.tl hodi komemora tinan 20 konstituisaun Repúblika Demokrátika Timor-Leste (RTDL).

“Benvindu ba portal Parlamentu Nasionál kona-ba tinan 20 konstituisaun RDTL,’’ Aniceto Longuinhos hateten iha nia diskursu iha ambitu lansamentu portal ne’e iha PN.

Portal ne’e iha informasaun sira ko’alia kona-ba prosesu inisíu istória hosi primeiru asembleia konstuiente ho menbru hamutuk na’in 88 oinsa dezenvolve servisu elabora konstituisaun no atividade deskusaun sira.

Nune’e enkoraza sidadaun hodi bele halo leitura ba faktu istóriku nune’e refleta mós kona-ba nasaun nia evolusaun polítika, sosiál no ekonómika hahú hosi elaborasaun konstituisaun mai to’o ohin loron hodi hatene.

“Povu no polítiku hotu ita durante ne’e sente orgullu ho Estadu RDTL ne’ebé hatur iha konstituisaun nu’udar lei inan. No ohin loron mundu rekuiñese ba TL nia demokrásia ne’ebé prinsípiu ho valór ho ninia regra demokrátiku sira hotu iha konstituisaun” Nia hateten

Prezidente Parlamentu ne’e, hateten konstituisaun RDTL halo ona  tinan 20 ona presiza tenke atualiza revizaun hodi adpta situasaun  real sosiál ho polítika ne’ebé sempre dinámika.

“Estadu iha nesesidade atu halo revizaun ba konstituisaun tanba tinan 20 ona hakarak ka lakoi reve hodi ajusta ba ita-nia realidade sosiál no polítika agora’’Nia fundamenta

Enterantu, partisipa iha serimónia lansamentu portal ne’e mai hosi Vise Prezidente PN na’in rua, deputadu sira, Sekretáriu Estadu Komunikasaun Sosiál (SEKOMS), Mericio Juvinal ‘Akara’ ho funsionáriu Parlamentu.

Jornalista : Nelson de Sousa

Editór       : Cancio Ximenes

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here