Ekipa CVTL halo fumigasaun hodi prevene surtu dengue iha bairru Becusse Sentrál, kinta (20/01/2022). Imajen Tatoli/Francisco Sony.

DILI, 07 fevereiru 2022 (TATOLI)—Reprezentante povu iha uma fukun Parlamentu Nasionál (PN), husu Ministériu Saúde atu halo fumigasaun ba iha eskola sira no fahe replente susuk (autan) ba estudante hodi halo prevensaun moras dengue, tanba daudaun ne’e eskola sira komesa aula inisíu letivu foun.

Notísia Relevante: Ohin, PN debate urjente ho Ministra Saúde kona-ba moras dengue

“Agora ita tama ona aula hahú ba kestaun dengue ne’ebé agora sai hanesan surtu nasionál nune’e husu Ministéiru Saúde hodi bele ba halo fumigasaun iha eskola sira-ne’ebé iha munisípiu tomak liu-liu parte sira-ne’ebé kazu aas tebes hanesan iha Comoro hodi  proteje estudante sira hosi kontamisaun susuk ne’ebé bele tata ho virus dengue,” Deputada Frente Mudansa (FM), Isabel Ximenes, levanta iha plenária Parlamentu Nasionál, segunda ne’e.

Nia mós fó hanoin nafatin tanba iha debate urjente foin lalais ne’e ho Ministra Saúde, ezjie ona hodi fahe replente susuk ka autan ba estudante sira, tanba Governu bele aloka netik osan hodi sosa.

Deputadu, Khunto, António Verdiál, preokupa kazu óbitu dengue ba labarik kontinua aumenta liu-liu iha HNGV seida’uk iha solusaun, no preokupa kondisaun HNGV iha kama ida pasiente labarik na’in-rua (2) ka tolu kontinua toba  hamutuk.

Nune’e, husu Ministra Saúde atu book an labele hosik buka mekanizmu di’ak ho lalais kazu dengue labele aumenta tan.

Deputadu PD, António da Conceção, apresia servisu Ministériu Saúde nian kona-ba intervensaun kazu dengue tanba hafoin PN halo debate urjente ho Ministra Saúde iha duni kampaña sensivilizasaun informasaun ba públiku ho ativu liuhosi panfletu no mós iha órgaun komunikasaun sosiál.

Tan ne’e, nia dehan, prevensaun dengue la’ós papél Governu nian de’it maibé presiza partisipasaun komunidade nian hanesan halo limpeza iha uma hodi labele fó fatin ba susuk hatolun no moris.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here