Reprezentante Organizasaun Mundiál Saúde (OMS) iha Timor-Leste, Arvind Mathur, ofialmente entrega ekipamentu saúde MALATHION ba Vise-Ministru Saúde, Bonifácio Maucoli dos Reis, hodi kombate moras dengue. Iha salaun Ministériu Saúde, segunda (07/02). Imajen Tatoli/Francisco Sony

DILI, 07 fevereiru 2022 (TATOLI)—Organizasaun Mundiál Saúde (OMS) apoia aimoruk ho tipu kímiku abate no Malathion ba Ministériu Saúde (MS) atu prevene surtu dengue ne’ebé númeru aas iha Timor-Leste.

“Ami apoia aimoruk abate kilograma 600 no malathion litru 200 ba Ministériu Saúde,  nune’e ami agradese tebes  bele servisu hamutuk ho Ministériu  Saúde hodi kombate moras dengue iha área risku sira liuliu iha munisípiu Dili nian,” Reprezentante  Organizasaun Mundiál Saúde (OMS) iha Timor-Leste, Arvind Mathur, hateten iha Palasiu Sinzas Caicoli, segunda ne’e.

Notísia relevante: Dengue hamate labarik na’in-27 iha Timor-Leste

Daudaun ne’e, surtu dengue hanesan problema nasionál, maibé, haree katak iha ospitalizasaun númeru baixa kauza dengue hahú menus tanba Minsitériu Saúde halo esforsu maka’as tebes.

Nune’e, OMS apoia brosura hamutuk 50.000 hodi halo advokasia ba komunidade sira atu hasa’e sira-nia konsiénsia hodi hatene kona-ba moras dengue.

Iha fatin hanesan, Vise Ministru Saúde, Bonifacio Maucoli dos Reis, hateten OMS apoia produtu ba Ministériu Saúde atu kombate dengue  ne’ebé mosu iha territóriu nasionál tomak liuliu iha munisípiu Dili.

“Agradese no orgullu ba OMS nia esforsu maka’as apoia ita liuliu halo kampaña,   nune’e bele redús moras dengue iha rai laran,” Vise Ministru  agradese.

Entretantu, Diresaun Nasionál Saúde Públika liuliu Departamentu Vijilansia Epidemolojia  iha Ministériu Saúde, hahú fulan-janeiru  to’o horiseik  pasiente dengue sa’e ba 1.604, hosi númeru ne’e na’in-27 mak mate.

Maioria kazu ne’e deteta husi Munisípiu Dili ho totál 1.068, Baucau 69, Manatuto 104, Covalima 58, Ermera ho kazu 77, Manufahi 69, Viqueque 28, Ainaro 22, Liquiça 32, Aileu 24 no Bobonaro 26 Lautem 24 no RAEOA na’in-tolu.

Munisípiu Dili nafatin rejista kazu ne’ebe a’as iha primeira semana to’o sesta semana fulan fevereiru 2022, ho totál kazu 1.068 kazu. Nune’e haree ba kada loron kazu aumenta bebeik husi Munisípiu Dili.

To’o ohin loron hahú semana dahuluk fulan janeiru tinan 2022, kazu dengue hosi postu administrativu Dom Alexo iha 565, Cristo-Rei 218, Vera-Cruz 124 no Nain Feto 132.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 249, Klínika Fatumeta 132, sentru saúde Comoro 310, sentru saúde Vera-Cruz 50, sentru saúde Formoza 170, sentru saúde Becora 113, Klínika Madre Eliza na’in-ida, Sentru saúde Atauro 11, Sentru Saúde Metinaro 16, Klínika Bairru-Pité 13 no Klínika Motael na’in-rua.

Notísia relevante:  Prevene dengue: MS halo fumigasaun rutina iha kapitál Dili

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here