Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 07 fevereiru 2022 (TATOLI)— Ministru Administrasaun Estatal (MAE), Miguel Pereira de Carvalho, segunda ne’e, hala’o sorumutuk ho Primeiru Ministru (PM), Taur Matan Ruak hodi relata preparasaun serbisu ba Eleisaun Prezidensiál ne’ebé  realiza iha loron 19 marsu tinan ne’e.

“Ha’u mai informa ba Primeiru Ministru kona-ba preparasaun servisu ba Eleisaun Prezidensiál nian ne’ebé sei organiza hosi orgaun ezekutór STAE ne’ebé halo ona preparasaun ne’ebé mak nesesária atu realiza Eleisaun iha 19 marsu agora,” Ministru Miguel, hateten ba jornalista-sira iha rezidénsia PM Faról-Dili, segunda ne’e.

Notísia relevante: STJ hahú verifika dokumentu kandidatu Prezidente Repúblika na’in-17

Governante ne’e mó relata kona-ba atu estabelese sentru votasaun Paralelu iha fatin tolu iha Dili espesiál ba sidadaun hirak ne’ebé la konsege ba vota iha munisipiu bele partisipa de’it iha sentru votasaun paralelu ne’e.

“Ita atu dehan ba públiku katak sira ne’ebé mak atu ba tuir Eleisaun iha sentru votasaun paralelu tenke informa ba STAE antes atu nune’e too loron Eleisaun sira nia naran bele mosu iha lista votante sentru paralelu nian,” nia afirma.

Nune’e, MAE koordena ona ho Ministériu Ensinu Superiór Siénsia no Kultura (MESSK) atubele informa ba Universidade hotu atu alunu balun ne’ebé iha loron Eleisaun labele fila ba munisípiu bele rejistu hosi Universidade hodi informa ba STAE.

“Ami mós hakerek ona karta ba Ministeriu Saúde katak sidadaun sira ne’ebé antes loron Eleisaun labele fila ba sira nia fatin bele informa ba STAE atu bele vota iha Dili,” nia dehan.

Kritériu atu vota iha sentru votasaun paralelu, dahuluk mak ba funsionáriu públiku ho nia motivu serbisu, ho nia mekanizmu katak ninia superiór másimu tenke fó deklarasaun no haruka naran ba iha Komisaun Funsaun Públika (KFP),  hafoin KFP haruka fali ba STAE.

Daruak, ba estudante, profesór no dosente sira iha eskola refere nia superiór mak Diretór Eskola ka Reitór mak halo deklarasaun ruma liuhosi Ministéiru Edukasaun Juventude no Desportu (MEJD) mak enkamiña ba iha STAE.

Datoluk, ba sidadaun ne’ebé mak halo tratamentu saúde iha Dili ne’e sei lori deklarasaun ka atestadu médiku hosi ospitál liuhosi Ministériu Saúde hafoin manda ba iha STAE.

Dahaat, ba komunidade ein jerál ne’ebé mak halo negósiu ka iha impedimentu ruma ne’ebé mak la fila ba nia munisípiu orijen sei hetan deklarasaun hosi xefe suku sei lori ba sentru atendimentu iha postu sira mak haruka ba iha STAE nasionál.

Ba Seguransa hanesan Polísia Siéntifika Investigasaun Kriminál (PCIC, sigla portugés) no FALINTIL-Forsa Defeza Timor-Leste (F-FDTL) sira-ne’ebé la hala’o knaar ho motivu eleisaun nian ne’ebé iha impedimentu mak labele fila ba sira-nia munisípiu resensiamentu eleitorál, mak sei hato’o deklarasaun ba iha superiór direta iha ida-idak tuir unidade jeográfika.

Ministériu Interior, Justisa no Defeza mak sei elabora lista hodi envia ba STAE iha loron tuir mai hafoin loron inskrisaun ba Sentru Votasaun Paralelu ramata.

Eleitór sira seluk ne’ebé iha impedimentu mak labele fila ba sira-nia munisípiu tuir unidade jeográfika resensiamentu eleitorál, mak sei deklara ba xefe suku ne’ebé eleitór sira lokaliza ba hodi hetan deklarasaun no eleitór sira utiliza deklarasaun xefe suku hodi bele halo inskrisaun iha STAE (STAE postu administrativu).

STAE sei pronunsia lista inskrisaun eleitór sira-ne’ebé vota iha Sentru Votasaun Paralelu iha prazu loron lima nia laran, no bainhira hatama deklarasaun ne’e tarde liu mak loron sanulu (10) antes tama ba eleisaun liu-liu dadus sira-ne’e tama ona iha STAE no STAE sei sinkroniza ho baze dadus.

Alterasaun artigu 31-A (Sentru votasaun paralelu)

Sentru votasaun paralelu ne’e sentraliza iha kapitál nasaun nian, destinada ba eleitór inskritu sira iha unidade jeográfika resensiamentu ne’ebé lokalizada fora hosi munisípiu Dili, ne’ebé hetan impedimentu, ho razaun médika, eskolár ka ezersísiu funsaun públika, bainhira dezloka ba lokalizasaun ne’ebé de’it iha sentru votasaun sira.

Bele mós vota iha entros de votasaun paralelu iha kualkér eleitór seluk ne’ebé inskritu iha unidade jeográfika resensiamentu lokaliza fora hosi munisípiu Dili, dezde justifika impedimentu iha dezlokasaun ba lokál ne’ebé estabelese sentru votasaun.

Estabelese sentru votasaun paralelu tolu, ida ba eleitór ne’ebé resensia iha munisípiu Lautém, Baucau on Viqueque, ida ba eleitór sira-ne’ebé resensia iha munisípiu Manatuto no Liquiçá, Aileu, Ermera no Postu Administrativu Ataúro, no ida ba eleitór inskritu iha munisípiu Ainaro, Bobonaro, Covalima, Manufahi no Rejiaun Administrativa Espesiál Oé-Cusse Amebeno (RAEOA).

Kada sentru votasaun paralelu só bele funsiona ho mínimu rejista eleitór atus-ida.

Artigu 31-B (Inskrisaun iha sentru votasaun paralelu)

Eleitór ne’ebé atu vota iha sentru votasaun paralelu, rejista ho entidade saúde, edukasaun ka Komisaun Funsaun Públika, konforme trata ema ida moras, estudante ka dosente, funsionáriu ka ajente públiku.

Eleitór sira seluk, ne’ebé refere iha númeru anteriór, ne’ebé que pretende vota iha sentru votasaun paralelu, aplika hosi STAE.

STAE fixa no anúnsia publikamente data inísiu no termina períodu rejistu refere iha númeru anteriór.

Entidade referida iha númeru 1 haruka ba STAE kona-ba lista eleitór sira-ne’ebé rejista ona, iha loron seguinte hodi termina períodu rejistu.

STAE elabora lista eleitór hosi kada sentru votasaun paralelu.

Eleitór inskritu iha sentru votasaun paralelu elimina hosi lista eleitór unidade geojráfika resensiamentu iha-ne’ebé rejista.

Inskrisaun iha sentru votasaun paralelu vale apenas ba eleisaun subsekuente.

Governu bele, iha sede regulamentasaun, adota medida seluk kona-ba prevensaun fraude, dezignadamente inutilizasaun kartaun eleitór, hafoin ezerse direitu votu.

Notísia relevante: STAE verifika ona kandidatu PR na’in-ualu, na’in-haat sei iha prosesu verifikasaun

Jornalista sira bele vota iha kualkér sentru votasaun

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here