Ministru Justisa, Manuel Cárceres da Costa. Imajen TATOLI/Francisco Sony

DILI, 07 fevereiru 2022 (TATOLI)— Governu liuhosi Ministru Justisa, Manuel Cárceres, segunda ne’e, lansa formasaun konservatóriu no notariadu  ba  konservadór no notáriu na’in-40 atu bá  tuir formasaun iha Universidade Coimbra-Portugál.

“Ohin, ita lansa terseiru formasaun kursu konservatóriu no notariadu ba ita nia formadu konservadór no notáriu nain-40  iha área lingua portugés, nune’e tempu badak sira sei arranka ba Universidade Coimbra iha Portugál,” Ministru Manuel, hateten ba jornalista sira iha salaun Ministériu Justisa Caicoli, segunda ne’e.

Notáriu no Konservadór hirak ne’e ba tuir formasaun iha  Universidade Coimbra atu eleva sira nian konesimentu  konservatóriu no notariadu nian.

Tanba Timor-Leste iha de’it konservadór no notáriu nain-21, maibé populasaun ne’ebé maka aumenta bebeik ho serbisu Estadu nian, presiza duni aumentu ema iha área ne’e.

“Ha’’u halo kooperasaun ona ho Universidade Coimbra foin lalais ne’e, nune’e  ita nia ema nain-20 sei aranka uluk ba tuir formsaun, hafoin nain-20  ba tuir tan. Tanba ne’e, ha’u husu ba sira ne’e mak hetan oportunidade hodi ba tuir formasaun iha Portugál atu aproveita tempu ho diak.  Nune’e bele lori rezultadu ne’ebe di’ak mai iha Timor-Leste,” Governante ne’e sujere.

Nia dehan, polítika VIII Governu nian, atu sertidaun titúlu ba rai ba sidadaun sira ne’e, la’ós Ministru Justisa mak atu asina, la’ós Diretor Terra no  Propriedade no la’ós Administrador Postu sira ka Xefe Suku sira mak asina, maibé sertidaun ne’e notáriu ho konservadór mak sei asina.

“Ita nia konservadór no notáriu ne’e sei delega ba munisípiu, oinsá atu fó atendimentu ba ita nian komunidade iha munisípiu ho serbisu hanesan rejistu sívil ba ema atu faan rai sosa no seluk tan,” nia akresenta.

Iha fatin hanesan, Diretora Jerál Ministériu Justisa, Marcelina Tilman da Silva, hateten, Formasaun  kursu datoluk ba koservadór no notáriu nain-40 , na’in-20 sei aranka uluk Portugál iha loron 22 fevereiru ne’e.

“Sira ne’ebe aranka ne’e tanba tuir teste ona lian portugés no na’in-20 mak sei iha prosesu laran tanba rekezitu ida mak lingua portugés sira tenke domina,” nia akresenta.

Kona-ba matéria formasaun ba formadu na’in-20 foku ba lian Portugés, área jurídiku notaridu no konservatóriu nian. Enkuantu nain- 20 ne’ebé tuir formasaun iha Timor-Leste maka lian Portugés, matéria jurídiku matéria kódigu sívil, rejistu sívil, kostituisaun no dentolojia profisionál.

Jornalista : Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here