Diretór Servisu Edukasaun Munisípiu Bobonaro, Crispim Lopes Monis. Imajen Tatoli/Sérgio da Cruz.

BOBONARO, 07 fevreiru 2022 (TATOLI) – Eskola Téknika Informatika (ETI) ne’ebé lokaliza iha postu administrativu Maliana, munisípiu Bobonaro,  segunda ne’e realiza serimónia graduasaun dalima ba finalista na’in-36 ne’ebé remata estudu iha períodu tinan 2021.

Finalista na’in -36 ne’e mai hosi departamentu rua kompostu hosi departamentu Téknika Língua rogramasaun (Soofwar) ema na’in-11 (mane na’in-tolu no feto na’in-sia) no Departamentu Tékniku Jestaun Ekipamentu Informátika (feto na’in-25 ida mane 24).

Estudante finalista sira-ne’e konklui ona atividade kurrikular no extra-kurrikular, hanesan aula teória no prátika, estájiu ka formasaun kontestu traballu durante fulan-tolu iha instituisaun sira iha Maliana no prova aptidaun profesional no ezame nasionál.

Diretór ETI Maliana, Mateus da Silva, hateten, graduasaun nu’udar jestu despedida entre  estudante finalista no nanorin-na’in sira, tanba ne’e husu atu kontinua aprende siénsia informátika bainhira kontinua estudu iha nível ensinu superiór.

“Graduasaun ida-ne’e hanesan pasu dahuluk iha ita-nia moris, hodi kontinua ba nível ida-ne’ebé aas-liu, labele satisfeitu ho saida mak imi iha ona, maibé nafatin buka hatene, tanba komunidade presiza duni ita-boot sira-nia matenek,” nia ko’alia Jináziu Maliana.

Entretantu, Diretór Edukasaun Munisípiu Bobonaro, Crispim Lopes Moniz, hateten, atu garante kualidade edukasaun ba estudante sira importante liu mak parte edukasaun no eskola presiza iha kondisaun infraestrutura ne’ebé favorável.

Nune’e mós rekursu umanu ne’ebé kualifikada no kurríkulu nune’e baihira termina estudu estudante sira bele hakle’an siénsia no teknolojia atubele kontribui ninia kapasidade ba dezenvolvimentu nasaun.

“ETI Maliana hatudu ona ninia kualidade tanba prova hatudu sira na’in-lima uluk ba halo estájiu, sira konsege apoiu no fó solusan ba problema ne’ebé edukasaun Bobonaro enfrenta, liuliu kona-ba informátika, ne’ebé kualidade ETI laiha dúvida,” nia katak.

Vise-Prezidente Asembleia Jerál Fundasaun Klibur Matadalan, Alcino João Barreto, agradese ba inan-aman ne’ebé mak durante ne’e depozita ona konfiansa ba eskola atu prepara estudante sira durante tinan tolu hodi forma sira-nia koñesimentu no abilidade sufisiente iha área informátika.

“Ba oin ami nafatin husu ba inan-aman sira labele dúvida mai eskola iha ETI tanba ezisténsia eskola ne’e atu fornese edukasaun ne’ebé kualidade, eskola ne’e iha kualidade, profesór lisensiadu, merstradu no iha mós kandidatu doutoramentu hodi sai fonte atu transforma matenek ba ita-nia oan sira,” nia subliña.

Graduandu Juvito Carlos Perreira dos Santos, sente kontenti no orgullu tanba durante tinan tolu, maske enfrenta problema no difikuldade oinoin maibé konsege finaliza estudu.

Estabelesimentu ETI Maliana durante tinan ualu kosenge prodús ona graduandu na’in-504. Daudaun ne’e profesór hamutuk na’in-14 ho ninia nível edukasaun lisensiadu na’in-sia, mestradu na’in-haat no kandidatu ba lisensiatura na’in-ida.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here