Membru Grupu Arte Marsiál hosi Korka, Kera Sakti, PSHT ne’ebe ezisti iha Covalima tuir eduksaun sivika hosi Komisaun Nasionál Eleisaun (CNE-Sigla Portugués) ho tema “Promove Esklaresimentu kona-ba Aktu Eleitorál no Eleisaun ne’ebe Rezilénte ho Covid-19”. Imajen Tatoli/Celestina Teles.

COVALIMA, 07 Fevreiru 2022 (TATOLI)–Komisaun Nasionál Eleisaun (CNE-Sigla Portugués) realiza edukasaun sivíka ho tema “Promove Esklaresimentu kona-ba Aktu Eleitorál no Eleisaun ne’ebe Rezilénte ho Covid-19” ba membru Grupu Arte Marsiál (GAM) sira hosi Korka, Kera Sakti, PSHT ne’ebe eziste iha Covalima.

“CNE realiza edukasaun sivíka kona-ba importánsia hosi eleisaun ba grupu arte marsiál sira  hodi ezerse sira-nia direitu  iha eleisaun tanba sira mós komponente no poténsia iha nasaun ida ne’e no iha kartaun eleitorál atu vota” Komisáriu CNE Destaka Munisipiu Aileu no Covalima, Carlito Martins, hateten ba jornalista sira iha salaun Uma Feto Santa Rosa, segunda ne’e.

Edukasaun sivika refere hala’o duránte loron ida ne’e, CNE sei fahe matéria sira mak hanesan papel CNE no STAE hanesan Órgaun Administrasaun Eleitorál, Krime Eleitorál, Kampaña Eleitorál no seluk tan.

KORK bandu membru uza atributu artemarsiál tuir kampaña

Entretantu Koordenadór Grupu Arte Marsiál Kmanek Oan Rai Klaran (KORK) iha Covalima, Justino Guterres Maia, bandu nia membru sira uza atributu arte marsiál partisipa iha kampaña no  ezerse nia votu iha sentru votasaun sira tanba lei la autoriza.

“Ami husi membru KORK husu ba membru sira labele uza atributu arte artemarsiál tuir kampaña eleisaun no ezerse nia direitu iha sentru votasaun, tanba atividade organizasaun no politíka la hanesan no lei la autoriza,” nia dehan.

Tanba ne’e, bainhira nia membru sira uza atributu arte marsiál partisipa iha kampaña no eleisaun mak sei submete ba autoridade judisiáriu hodi halo prosesu investigasaun tanba KORK la autoriza membru sira uza atributu arte marsiál atu partisipa iha kampaña no ezerse sira-nia direitu votu iha sentru votasaun.

Bazea ba lei númeru 5/2017 rejime juridíku, lei kona-ba arma branka bandu ema uza sasán kro’at no uza atributu artemarsiál no arte rituál.

Tuir kalendáriu ne’ebé dekreta hosu Prezidente Republika Francisco Guterres Lú-Olo eleisaun prezidensiál realiza iha loron 19 fulan marsu tinan ne’e, no daudaun ne’e kandidatura na’in-17 mak regista ona iha iha tribunal rekursu  mak  hanesan Anacleto Fereira, Angela Freitas, Antero Benedito da Silva, Armanda berta dos Santos, Constancio Pinto, Felizberto Araújo Duarte, Francisco Guterres Lú-Olo, Hermes da Rosa Correia Barros, Isabel Ferreira, José Manuel Ramos Horta, Lere Ana Timur, Luis Alves Tilman, Mariano Assanami Sabino, Martinho Gusmão, Milena Pires, Rogerio Lobato no Virgilio Guterres atu kompete iha eleisaun presidensiál 2022. .

Tuir Konstituisaun RDTL iha artigu 65 koalia kona-ba eleisaun sira mak hanesan:

1.Órgaun eleitu soberania nian ho podér lokál sei hili tuir eleisaun, hosi eleisaun universál, livre, diretu, sekretu ema ida votu ida, no periódiku.

  1. Resenseamentu eleitorál ne’e obrigatóriu, ofisiál no ida de’it no universál no sei atualiza iha eleisaun ida-idak.
  2. Kampaña eleitorál hala’o tuir PRINSÍPIU hirak tuirmai ne’e: a) Liberdade ba propaganda eleitorál; b) Oportunidade no tratamentu hanesan ba kandidatura hotu-hotu; c) Imparsialidade na’in ulun boot públiku sira-nian kona-ba kandidatura; d) Transparénsia no fiskalizasaun sura votu nian.
  3. Konversaun votu nian iha mandatu hala’o tuir sistema reprezentasaun proporsionál.
  4. Prosesu eleitorál sei regula tuir lei.
  5. Órgaun independente maka sei tau matan ba resenseamentu no eleisaun sira. Lei maka estabelese orgaun ne’e nia kompeténsia, kompozisaun, organizasaun no nia knaar.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here