Diretór STAE, Acilino Manuel Branco. Foto Tatoli/Egas Cristovão

DILI, 05 fevereiru 2022 (TATOLI) – Diretór Jerál Sekretariadu Tékniku Administrasaun Eleitorál (STAE), Acilino Branco, fó-sai katak, lei fó dalan ba profisionál órgaun komunikasaun sosiál ka jornalista sira bele vota iha kualkér sentru votasaun iha eleisaun prezidensiál.

“Atu fasilita jornalista sira halo kobertura iha prosesu eleitorál ida ne’e prevee kedas iha lei  no mós dekretu Governu ne’ebé fó dalan mídia públiku no privadu atu halo kobertura prosesu tomak hahú hosi inisíu Prezidente Repúblika dekreta kaléndáriu ba to’o iha rezultadu eleisaun. Nune’e lei fó dalan ba jornalista bele vota de’it iha fatin ne’ebé mak sira hala’o kna’ar hanesan jornalista iha kualkér sentru votasaun iha territóriu nasionál, la presiza ba vota iha fatin rejistu tuir kartaun eleitorál,’’ Diretór Jerál STAE informa ba Agéncia Tatoli iha kna’ar-fatin, Caicoli, sábadu ne’e.

Nia esplika, prosesu ka mekanizmu akreditasaun instituisaun mídia idak-idak bele haruka pedidu liuhosi Konsellu Imprensa (KI) hafoin KI haruka ba iha STAE  antes loron 10 eleisaun, ne’ebé aprezenta ho fotográfia, kartaun eleitorál nune’e STAE sei emite akreditasaun.

Akreditasaun ne’e ho baze ba lei no dekretu Governu númeru 9/2022, 14 janeiru, alterasaun dahuluk hosi dekretu Governu númeru 10/2017, 27 fevereiru, ne’ebé aprova prosedimentu tékniku ba realizasaun atividade kobertura jornalístika iha eleisaun prezidensiál.

“Dekretu ne’e iha artigu hamutuk 12 iha ne’eba regulariza prosesu akreditasaun ba iha profisional mídia orgaun komunikasaun sosiál sira ho mós direitu asesu iha lokál kobertura sira no devér,” nia fundamenta.

Nia dehan,  ida-ne’e la viola tanba regula iha lei no STAE bainhira administra prosesu ne’e nunka aplika prosesu sira sees hosi lei no dekretu Governu.

Tanba ne’e,  STAE halo komunikasaun ho Konsellu Imprensa hodi bele realiza prosesu akreditasaun hodi fasilita jornalista sira iha periódu eleisaun prezidensiál.

Iha parte seluk, Diretór Jerál STAE, Acilino Branco, fó-sai katak, sentru votasaun paralelu ne’ebé realiza iha Dili sei la autoriza jornalista sira atu ezerse direitu votu tanba votasaun paralelu sei ba de’it  situasaun nesesáriu ba  komunidade, funsionáriu públiku, estudante no sidadaun ho kondisaun moras.

Jornalista         : Nelson de Sousa

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here