Primeiru-Ministru, Taur Matan Ruak hamutuk ho Vise Primeiru-Ministru no Ministra Solidaridade Sosiál no Inkluzasaun, Armanda Berta dos Santos, inklui membru Governu relevante no parseiru dezenvolvimentu hasai foto hamutuk, iha lansamentu dokumentu Estratéjia Nasionál ba Protesaun Sosial 2021 – 2030 iha Salaun City 8 – Has Laran Dili, sexta (04/02). Imajen TATOLI/Egas Cristóvão

DILI, 04 fevereiru 2022 (TATOLI)–Primeiru-Ministru (PM), Taur Matan Ruak, akompaña ho Vise Primeira-Ministru no Ministra Solidaridade Sosiál no Inkluzaun (MSSI), Armanda Berta dos Santos, sesta ne’e, halo lansamentu dokumentu Estratéjia Nasionál ba Protesaun Sosiál ba tinan 2021 to’o 2030.

Xefe Governu konsidera, dokumentu ne’e hakarak kontribui ba medida prátika, efetiva no konkreta ba kumprimentu hosi kompromisu oioin ba povu no parseiru dezenvolvimentu nasionál no internasionál.

“Dokumentu ne’ebé implementa vizaun Governu hodi koloka sidadaun iha sentru atividade governativa no kria kondisaun sira, atu nune’e ema hotu benefisia vantajen kreximentu no dezenvolvimentu nasionál, ho asesu adekuadu ba serbisu báziku, esensiál no protesaun sosiál, iha oportunidade no sirkunstánsia ne’ebé hanesan no la husik ema ida ba kotuk,” Xefe Ezekutivu hateten liuhosi diskursu iha ámbitu lansamentu dokumentu Estratéjia Nasionál ba Protesaun Sosiál 2021-2030, iha salaun City 8, Manleuana.

Notísia relevante: MSSI estabelese Estratejia Nasionál Protesaun Sosiál períodu tinan 2021-2030

Vizaun ne’ebé pretende, tuir faze no adapta ho kapasidade país, atu extende serbisu protesaun sosiál universál hotu, hodi halo sai asesível loloos iha territóriu nasionál tomak, liuliu iha fatin izolada no dezfavoresida liu, ne’ebé hanesan faze foun ba konstrusaun polítika protesaun sosiál iha Timor-Leste.

Estrajia nasionál ne’e lidera hosi Ministériu Solidariedade Sosiál no Inkluzaun (MSSI), konta ho apoiu tékniku no espesializadu hosi parseiru dezenvolvimentu sira, liuhosi programa ACTION hosi Organizasaun Internasionál Traballu (ILO, sigla portugés) ne’ebé finansia hosi Governu Portugal.

Nune’e, PM agradese ba serbisu hotu ne’ebé realiza hosi funsionáriu, asistente, tékniku no espesialista sira, ne’ebé kontribui ona ba diagnóstiku no perfíl situasaun nasionál ho fundamenta asaun sira ne’ebé tenke realiza iha dékada tuirmai.

“Asaun sira ne’ebé tuir ha’u-nia opiniaun nu’udar objetivu konstitusionál importante, ne’ebé asume ona iha programa Governu, tuir  Planu Estratéjiku Dezenvolvimentu Nasionál (PEDN) no ho Objetivu Dezenvolvimentu Sustentável nian sira (ODS), ne’ebé ninia objetivu to’o tinan 2030 atu halakon hamlaha no ki’ak, hodi hadi’a nível nutrisaun no dezenvolvimentu umanu,” nia akresenta.

Objetivu seluk mós atu promove asesu serbisu báziku sira ne’ebé ho kualidade iha área saúde, edukasaun, abitasaun, eletrisidade, bee no saneamentu, ho protesaun sosiál ne’ebé adekuadu ba grupu sira ne’ebé mukit liu, vulnerável no dezfavoresidu, ba lian laek, ema haluha no sira ne’ebé hasoru risku eskluzaun sosiál boot.

Ba inisiativa ne’e, asaun iha terrenu tenke lais hodi mobiliza ba efeitu la’ós de’it rekursu  no funsionáriu Estadu, maibé ho kolaborasaun transversál no integrada hosi entidade, doadór, parseiru dezenvolvimentu no organizasaun sosiedade sivíl, ne’ebé husik kedas restaurasaun ba independénsia kontribui ba implementasaun programa apoiu oioin ba labarik, inan, idozu, inklui sidadaun sira ne’ebé ho kondisaun defisiénsia no grupu sira seluk ne’ebé ho vulnerabilidade boot.

Xefe Governu kompromete atu kontinua konta ho apoiu importante iha faze foun, ne’ebé hahú agora ho estrutura operasionál foun, enkuadramentu legál forte no reforsa meiu implementasaun, monitorizasaun no avaliasaun ba rezultadu sira, ne’ebé koloka ba dispozisaun Konsellu Nasionál nian ba Protesaun Sosiál hosi Sekretariadu Ezekutivu no hosi grupu inter-institusionál, ne’ebé sei kolabora ho autoridade tutelár Governu.

Faze ida ne’ebé ezijente liután mak sei presiza investimentu barak iha koordenasaun institusionál, armonizasaun ba prosedimentu, kolesaun ba dadus, estatístika, inklui formasaun no kapasitasaun ba rekursu umanu, atu nune’e garante serbisu sira ho kualidade ne’ebé di’ak no sustentável liu.

“Ha’u fiar Timor-Leste iha dalan loos ba protesaun sosiál, ne’ebé adekuada ba ema hotu ho nível protesaun ne’ebé adapta ba nesesidade sidadaun, tuir rekomendasaun ILO. Protesaun sosiál kontributiva hodi garante partisipasaun ativa sidadaun sira, estimula espíritu pertensa no sidadania konxiente liu,” nia tenik.

Protesaun sosiál ne’ebé solidária liu ba traballadór sira hodi tulun iha dezafiu família no profisionál, iha kapasidade atu atua iha momentu moras, tuur-ahi ka dezempregu, nune’e protesaun ne’ebé ekuitativa liu no ativu iha pás sosiál, ho reforsu ba mekanizmu sira atu hamenus risku eskluzaun no vulnerabilidade sosiá.

Iha mós protesaun sensível liu ba ema kiak no vulnerável sira atu tulun ema sira iha momentu risku, kalamidade ka emerjénsia hodi bele kontribui ba dezenvolvimentu umanu sidadaun ida-idak no kria kondisaun nesesária ba moris.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here