Diretór Ezekutivu FDCH foun, Cristovão dos Reis (karuk) hasai foto hamutuk ho Prezidente Konsellu Administrasaun FDCH no atuál Ministru Ensinu Superiór Siénsia no Kultura, Longuinhos dos Santos (klaran) no Diretór Ezekutivu FDCH sesante, Hermenegildo da Silva (loos). Imajen/FDCH

DILI, 04 fevereiru 2022 (TATOLI)—Prezidente Konsellu Administrasaun Fundu Desenvolvimentu Kapitál Umanu (FDCH, sigla portugés) no atuál Ministru Ensinu Superiór Siénsia no Kultura (MESSK), Longuinhos dos Santos,  nomeia Cristovão dos Reis hanesan Diretór Ezekutivu hodi troka Hermenegildo da Silva.

“Ha’u husu ba Diretór sesante atu kontinua kolabora ho diretór foun hodi hala’o serbisu, nune’e bele lori progresu dezenvolvimentu nasaun nian, liuliu iha dezenvolvimentu rekursu umanu iha Timor-Leste,” refere nota ne’ebé Agência TATOLI asesu, sesta ne’e.

Notísia relevante: OJE 2022: PN aprova orsamentu millaun $12 ba FDCH

Nomeasaun Cristovão dos Reis, ne’ebé hanesan mós funsionáriu públiku, mai ho objetivu atu lori ambiente foun ba serbisu.

Biban ne’e, Prezidente Konsellu Administrasaun FDCH, hato’o agradesimentu ba diretór sesante FDCH Hermenegildo da Silva, tanba maski hala’o ninia knaar durante fulan-neen maibé konsege hala’o serbisu importante sira.

Diretór Ezekutivu FDCH foun, Cristovão dos Reis, komprometidu sei lori instituisaun ba oin ho apoiu hosi ekipa serbisu, tanba instituisaun ne’e iha papél importante prepara joven ba fututu país.

“Ho konfiansa ne’ebé haraik mai ha’u, sente todan, maibé ha’u-nia família boot FDCH besik 50, ha’u ho sira, sira ho ha’u, todan ne’ebé mak iha ami hamutuk hodi hakat, ha’u fó konfiansa tomak ba ita-boot sira atu ita serbisu hamutuk lori FDCH ba oin,” Diretór Ezekutivu dehan.

Nune’e mós, Diretór Ezekutivu FDCH sesante, Hermenegildo da Silva, agradese ba konfiansa ne’ebé depozita ba nia hodi lidera instituisaun ne’e.

“Mandatu finaliza ona, antes ne’e Diretora Ezekutiva FDCH sesante rezigna-an tanba asuntu família,” nia akresenta.

Cristovão dos Reis durante ne’e halo knaar nu’udar dosente iha Universidade Nasional Timor-Lorosa’e (UNTL) no nia mós nu’udar benefisiáriu bolsa estudu FDCH, ne’ebé hasai estudu doutoramentu iha Portugal.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here