Mediku sira vasina Pfizer Covid-19 ba estudante sira iha Dili 30/11/2021.Imajen TATOLI/Antonio Dasiparu.

DILI, 03 fevereiru 2022 (TATOLI)— Diretora Servisu Saúde Munisípiu Dili, Agostinha Segurado, informa labarik idade 12 to’o menus 18 ne’ebé mak simu ona vasina pfizer doze kompletu hamutuk 29.901.

“Ita-nia kampaña ba vasina Pfizer ba labarik idade 12 to’o 18 ne’ebé simu ona doze dahuluk   to’o loron 02 fulan-fevereiru   atinji ona 37,045 no doze daruak atinje ona 29.901,” Diretora Agostinha, hateten ba jornalista sira iha nia kna’ar-fatin, kinta ne’e.

Labarik sira ne’ebé mak seidauk kompleta doze daruak hamutuk 7.144, nune’e munisípiu Dili nia tarjetu  loloos  hamutuk 42.210, maibe husi númeru ne’e labarik ne’ebé mak seidauk vasina hamutuk 5.165.

Tuir dadus estimasaun hosi Ministériu Saúde katak labarik-sira ne’ebé la eskola ho 6.584 mak tenke hetan vasina, maibé husi numeru ne’e hetan ona vasina hamutuk 1.00- resin.

Daudaun, Sentru Saúde sira kontinua simu nafatin estudante sira no la’ós estudante atu hakbesik an hodi simu vasina Pfizer.

“Ita loke nafatin postu saúde  tanba eskola tama fila-fali ona no mantein loron loron hein estudante sira mai halo vasina,   maibé asesu ne’ebé mak mai ne’e minímu loos  inklui mos ita aviza ba iha suku no ita  tama uma sai uma atu husu para aseleira ba iha doze daruak.Tanba durante ne’e estudante sira simu tiha doze dahuluk too tempu atu simu doze daruak sira feriadu,” nia akresenta.

Kona-ba estudante sira iha Atauro ne’ebé simu ona doze dahuluk hamutuk 920 no doze daruak iha 624.

“Iha balun mak seidauk simu vasina daruak, maibé progressu di’ak tanba ne’e agradese ba inan-aman sira nia kolaborasaun ho ekipa saúde,” nia agradese.

Entretantu, Diretora Servisu Saúde Munisípiu Dili, hateten liña frente sira ne’ebé mak simu ona vasina  doze datoluk hamutuk 5607.

“Ita hahú vasina doze datoluk iha loron 3 janeiru to’o horiseik  ba ema ne’ebé simu ona hamutuk 5.607 husi númeru ne’e mai hosi  ema  adultu ka idade,  komorbidade, profisionál saúde no  membru Governu balun,” Diretora Agostinha afirma.

Tanba ne’e   vasina datoluk la’o nafatin iha sentru saúde sira, bainhira labarik sira simu vasina sira nian ekipa saúde mós kontinua vasina ba ema adultu sira ne’ebé mak hakarak atu simu vasina datoluk liuliu ba liña frente sira ho idade 60 ba leten ho moras komorbidade.

“Agora vasina doze datoluk ne’e atu hasa’e ema nia imunidade hodi hasoru virus Omicron ne’e klaru katak nia iha imunidade sufisiente bainhira omicrom kona nia gravidade la to’o iha ospitalizasaun ,” nia esplika.

Vasina ne’ebé Australia apoia iha semana kotuk ne’e prioridade ba labarik sira  tanba labarik iha 11 munisípiu  inklui RAEOA seidauk simu.

Notísia relevante: COVID-19: kazu detetadu pozitivu 41 no ativu 309

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here