SEA sensibiliza protesaun kamada ozonu ba komunidade iha ámbitu semana ozonu, iha Timor-Plaza, kinta (03/02). Imajen TATOLI/Arminda Fonseca

DILI, 03 favereiru 2022 (TATOLI)—Sekretaria Estadu Ambiente (SEA), kinta ne’e, halo atividade sensibilizasaun kona-ba protesaun kamada ozonu ba entidade oin-oin.

“Timor-Leste ratifika ona konvensaun viena, ba protesaun kamada ozonu no protokolu montreal, ne’ebé operasionaliza konvensaun viena iha tinan 2009. Kamada ozonu iha atmósfera importante tebes ba vida tanba ozonu atmofériku konsidera di’ak ba ema no forma moris seluk tanba bele absorve radiasaun ultravioleta (UV) hosi loron, ne’ebé prevene atu to’o iha superfisie rai, nune’e ita sensibiliza ba komunidade atu kontribui ba kamada ozonu ho di’ak,” Sekretáriu Estadu Meiu Ambiente, Demétrio do Amaral de Carvalho, hateten, hafoin atividade sensibilizasaun iha Timor-Plaza.

Notísia relevante: Kamada Ozóniu Mihis, Fó Efeitu ba Saúde Umana

Atividade ne’e tanba daudaun tama ona iha semana ozonu, ne’ebé iha loron 16 fevereiru sei selebra loron mundiál protesaun kamada ozonu.

Bainhira ozonu nia kamada kuak, bele afeta ba estraga umanidade hanesan kauza ba kankru kulit, rede ai-han hetan risku, matan sofre katarata.

“Entaun Timor-Leste tau importánsia boot atu envolve ba kontrolu ne’e tanba iha tinan 2012 Governu prodús dekretu-lei ba kontrolu importasaun no exportasaun uzu gás sira ne’ebé hamiis kamada ozonu, ne’ebé ba kestaun ne’e ita hamutuk ho nasaun 180 halo regulamentu nível doméstiku ho kooperasaun nível rejionál no internasionál kombate gás sira,” nia akresenta.

Nune’e, sensibilizasaun ne’e ema hotu, liuliu ba importadór, utilizadór refrijeradór no ar condisionadu (AC), tanba AC balun la amigável ho ozonu, tanba ne’e entidade sira presiza hahú kompreende atu kombate.

“Ita-nia kontribuisaun iha planu nasionál ba jestaun gás sira ne’ebé hamiis kamada ozonu, ba faze dahuluk bele dehan ita to’o nível ida satizfatóriu tanba ita-nia atinjementu to’o ona 65% iha tinan 2018 no ohin ita hahú implementa faze daruak planu nasionál ba jestaun gás sira ne’ebé hamiis kamada ozonu. Espera ema hotu kontribui ba estratejia face out no face down ba gás ne’ebé hamiis kamada ozonu, nune’e bele kontribui di’ak ba kontrola gás ne’ebé hamiis kamada ozonu,” Sekretáriu Estadu dehan.

Gás sira ne’ebé kontribui bele hamenus kamada ozonu ka substánsia hamenus ozonu (ODS, sigla inglés) gás sira hanesan klorofluorokarbonetu (CFC) no idrokhlorofluorokarbons (HCFC).

“Gás sira ho tipu CFC ita hahú kombate no ita tama daudaun ona ba gás HCFC, ne’ebé mak la’ós de’it hamiis kamada ozonu, maibé hanesan gás vidru uma, entaun ita reforsa liután tanba nia fó efeitu dupla hamiis kamada ozonu no kontribui ba mudansa klimátika,” nia tenik.

Iha tinan 1987, komunidade globál serbisu maka’as hodi halakon substánsia ne’ebé ladi’ak ba kamada ozonu, bazeia ba konvensaun viena no protokolu montreal kona-na substánsia sira hamenus kamada ozonu, nune’e esforsu koletivu ne’e rezulta iha istória susesu ambientál boot ida.

“Iha ita-nia tempu, evidénsia sientífiku hatudu katak kamada ozonu iha dalan atu rekopera fali iha sékulu ida-ne’e nia klaran, foin lalais alterasaun Kigali aumenta tan objetivu protesaun klimátika ba protokolu montreal, liuhosi eliminasaun HCFC, altera ba ODS ne’ebé iha poténsia boot atu kontribui ba akesimentu globál,” nia esplika.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here