Komunidade kontinua simu vasina iha Sentru Saúde sira, segunda (30/08/21). Imajen Tatoli/António Gonçalves.

DILI, 03 fevereiru 2022 (TATOLI)—Primeiru-Ministru (PM), Taur Matan Ruak, preokupa daudaun ne’e rejista ona kazu COVID-19 ho virus variante Omicron na’in-rua (2) iha Timor-Leste, nune’e husu sidadaun hotu simu vasina aumenta imunidade hodi prevene an.

Notísia Relevante: Timor Leste rejista kazu konfirmadu variante Omicron na’in-rua

“Ida-ne’e preokupasaun boot ida maibé medida ita tenke toma no reforsa mak kampaña vasinasaun no ita agora iha vasina hanesan ita hatene tinan kotuk, ita soe tiha vasina 1000-resin ba kaixa lixu tanba ema la ba simu,” PM hateten ba jornalista sira hafoin ramata sorumutu semanál ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, kinta ne’e.

Atividade kampaña vasina ne’ebé Estadu liuhosi Ministéiru Saúde iha ba sidadaun sira, nune’e nia apela sira-ne’ebé seidauk simu vasina favór ida tenke vasina no sira-ne’ebé simu doze primeiru tenke ba simu tan doze segundu no terseiru.

Regra ne’ebé Ministériu Saúde no Organizasaun Mundiál Saúde katak laiha nesesidade hodi diminui movimentu adomerasaun konsentrasaun ema barak maibé se iha nesesidade tenke halo, nune’e Governu nia esforsu tenta hela haree asaun sira-ne’ebé atu halo.

Durante sormutu, Prezidente Repúblika hato’o mensajen mós ba sidadaun ida-idak tenke hadomi sira-nia an, nune’e koopera liu-liu ba Ministériu Saúde haree ba situasaun COVID-19, moras dengue no moras sira seluk.

Tuir dadus, Ministeriu Saúde to’o iha loron 02 fevereiru ne’e relata katak situasaun OVID-19 iha territóriu ho kazu detetadu foun 31, rekuperadu laiha no kazu ativu 268, nuune’e hahú 21 marsu 2020 to’o 02 fevereiru 2022 iha kumulativu kazu konfirmadu 20136 no óbitu 122.

Enkuantu, populasaun elijível tinan 18 ba leten ne’ebé simu ona vasina to’o iha loron 02 fevereiru 2022 tuir sistema informasaun Saúde iha Ministériu Saúde, hanesan kumulativu doze dahuluk iha Dili 87,9% no kumulativu doze daruak iha Dili 82,3%.

Ba sidadaun iha territóriu nasionál ne’ebé simu ona vasina doze dahuluk iha Timor-Leste 84,2% no simu ona doze daruak 70,8%.

Iha loron 02 fevereiru 2022, izolamentu Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu neen, moderadu rua no kaman haat.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here