Bandeira Uniaun Europeia

DILI, 03 fevereiru 2022 (TATOLI)Prezidente Komisaun Nasionál ba Eleisaun (CNE,sigla portugés), José Agostinho da Costa Belo, hateten ekipa observadór husi Uniaun Europeia hamutuk ema na’in 26 sei to’o iha Timor-Leste, iha fulan- fevereiru 2022 hodi observa prosesu kampañia eleitorál  to’o eleisaun prezidensiál.

“Sira-nain 26 mak preparadu ona atu mai tanba ne’e CNE ho STAE mak servisu ho sira no ami-nia ekipa iha nível munisípiu mós ofisiál atu nune’e bele fó relatóriu ba sira hodi ba ita-nia prosesu ne’ebé mak la’o iha iha rai-laran,” José da Costa Belo, informa ba jornalista sira hafoin asina nota intendimentu ho Embaixadór UE kinta ne’e, iha salaun MNEK, Praia dos Qoqeiros Dili.

Notísia Relevante : Eleisaun ba Prezidente Repúblika sei akontese iha 19 marsu 2022

Nia dehan prezensa observadór husi UE importante hodi observa prosesu demokrasia durante eleisaun prezidensiál, tanba ne’e, observadór hirak ne’e sei destaka bá iha Munisípiu 11, Rejiaun Administrativa Espesiál Oé-Cusse Ambeno (RAEOA) inklui Munisípiu Dili.

Iha fatin hanesan Embaixadór Uniaun Europeia iha Timor-Leste, Andrew Jacobs, orgullu tanba simu ona pedidu husi Governu RDTL iha loron 12 fulan-jullu 2021 hodi haruka observadór sira mai TL.

“Ha’u kontente simu konvite hosi Ministériu Administrasaun Estatál (MAE) atu lansa misaun observasaun eleisaun iha Timor-Leste maibé importante mak ohin, asina akordu administrativu no ami-nia ekipa téknika iha Dili agora prepara hela misaun observasaun,” nia hateten.

Tuir nia akordu ne’e ho objetivu atu organiza relasaun entre Misaun Observasaun Eleitorál ho autoridade relevante sira husi Repúblika Demokratika Timor-Leste.

Akordu ne’e ho pontu sira mak hanesan tuirmai, membru Misaun Observasaun Eleitorál sira sei mantein imparsialidade, objetividade no independénsia durante hala’o sira-nia mandatu.

No husi  parta Timor-Leste sei fasilita ho asisténsia nesesáriu ba implementasaun Misaun Obsrvasaun Eleitorál  durante hala’o misaun iha Timor-Leste, inklui liberdade sirkulasaun ba teritóriu tomak, liberdade asesu ba interveniente no seluk tan.

Daudaun ne’e, UE identifika hela xefe observadór husi Parlamentu Uniaun Europeia nian hodi lidera ekipa observadór hirak ne’ebé sei mai Timor-Leste iha tempu besik.

Entertantu, UE  iha 2002, 2007, 2012, 2017 delega ona ekipa observadór mai Timor-Leste hodi observa eleisaun jerál no prezidensiál  no mós iha tinan 2018 haruka Misaun Peritu Eleitorál mai TL.

Notísia Relevante :12 fevereiru, STAE sei transposrta materiál eleisaun ba diáspora

Jornalista :Osória Marques

Editór :Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here