DILI, 03 fevereiru 2022 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, kinta ne’e halo diskusaun ho Reprezentante husi World Bank Group, Bernard Harbone, iha Palacio do Governu hodi diskute kona-ba planu kooperasaun servisu iha futuru.
Ministru Francisco Jerónimo hateten asuntu importante iha diskusaun ne’e maka kona-ba gastu finansa públika, orsamentu petróliu, rekursu umanu liga ho área komunikasaun sosiál no Parlamentu Nasionál.
“Reprezentante Banco Mundiál, Bernard Harborne mai iha ne’e ami ko’alia oituan kona-ba gastu públiku iha sala situasaun ne’ebé mak aprova iha Parlamentu Nasionál, entaun husu atu oinsá atividade sira ne’e bele la’o ho Parlamentár sira,” Ministru Asuntu Parlamentár no Komunikasaun Sosiál, Francisco Martins Jerónimo, hateten iha Palasiu Governu Dili.
Diskusaun ne’e sei kontinua filafali iha fulan-maiu 2022 hafoin tomada pose ba Prezidente Repúblika foun, tanba daudaun ne’e, tama ona iha prosesu kampañia eleitorál no eleisaun prezidensiál.
“Esperansa ba oin ita bele servisu hamutuk di’ak liután no hametin tan relasaun entre Ministériu ho Banku Mundiál atu bele haree problema ne’ebé Ministériu rasik enfrenta no mós liga ho Parlamentu. Tanba, problema ne’ebé ita iha mak rekursu la sufisiénte, se ita persiza rekursu ruma bele ko’alia ho sira, atu sira bele fó apoia ita kona-ba rekursu humanu, liliu rekursu ba área mídia no Parlamentu,” nia dehan.
Iha fatin hanesan World Bank Group, Bernard Harborne, hateten enkontru ne’e atu haree MAPKOMS ninia vizaun no misaun no mós planu ba tinan ida tuirmai.
“Nune’e, ami-nia objetivu mai hasoru Ministru iha ne’e atu haree oinsá ami-nia diskusaun haree ba orsamentu, liliu haree ba gastu públiku. Alende ne’e, haree mós ba Parlamentu Nasionál nia diskusaun, orsamentu no mós haree ba fundu petróliu,” nia hateten.
Jornalista : Nelia Fernandes
Editór : Agapito dos Santos
