Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 03 fevereiru 2022 (TATOLI)–Diresaun Nasionál Edifikasaun Ministériu Obra Publika (DNE-MOP) garante kualidade edifísiu foun Fakuldade Ekonomia no Jestaun (FEJ), Universidade Nasionál Timor-Lorosa’e (UNTL) ne’ebé foin inaugura.

Edifísiu ne’e andár rua ho sala aula 18, ho medida 45×12, ne’ebé ho kustu ho montante $672.758.

Tuir Diretór Diresaun Nasionál Edifikasaun Ministériu Obra Publika, Domingos de Jesus Sequeira, antes ne’e halo ona avaliasaun no verifikasaun ba kondisaun edifísiu.

“Maski konstrusaun edifísiu Fakuldade Ekonomia no Jestaun ne’e konsidera tarde tanba impedimentu hosi problema pandemia COVID-19, maibé edifísiu ne’e tama kategoria kualidade,” Diretór Domingos hateten ba jornalista sira iha Fakuldade Ekonomia Jestaun UNTL, kinta ne’e.

Ezisténsia DNE ba konstrusaun ne’e hahú kedan hosi prosesu dezeñu inklui verifikasaun ba estrutura tomak, arkitetura mekánika, elétrika no flambin, tanba lei ne’ebé vigora iha diploma ministeriál fó dalan ba DNE-MOP atu toma responsabilidade tomak ba konstrusaun edifísiu ministériu ka instituisaun Estadu.

Nune’e mós, Reitór UNTL, João Martins, kontente tanba bele hetan tan edifísiu foun ho sala aula 18, ne’ebé atu garante mós prosesu aprendizajen ba estudante sira.

“Ha’u kontente tanba inaugurasaun edifísiu foun ne’e bele hadi’a liután kondisaun infraestrutura tanba sala aula ne’ebé adekuadu ba estudante sira bele aprende. Maski edifísiu ne’e kabe ba FEJ, la signifika estudante de’it mak bele uza fasilidade ne’e. Tanba edifísiu foun ne’e ninia sala aula modernu no kapas, sei fó ambiente di’ak ba estudante sira atubele estuda,” nia akresenta.

Iha biban hanesan, Ministru Ensinu Superiór Siénsia no Kultura, Longuinhos dos Santos, hateten dezafiu boot ba ensinu superiór maka hadi’a no prepara infraestrutura ho kualidade.

”Ha’u hakarak hato’o felisitasaun ba estrutura anteriór, hafoin kontinua fali hosi reitór atuál tanba konsege finaliza konstrusaun,” nia tenik.

Konstrusaun infraestrutura adekuadu asegura ona dezenvolvimentu ensinu aprendizajen ho kualidade no prioridade ba VIII Governu Konstitusionál, tanba área infraestrutura konta ona iha polítika nasionál ensinu superior ne’ebé hetan aprovasaun iha Konsellu Ministru.

“Inaugurasaun edifísiu ne’e signifikante boot tanba atu hadi’a di’ak liután kualidade rekursu umanu, UNTL atu hetan kondisaun adekuadu hodi reprezenta rekursu umanu ho kualidade no bele kumpre ona lema instituisaun ensinu superiór kualidade iha formasaun ne’ebé maka futuru ba nasaun. Ho nune’e, investimentu VIII Governu Konstitusionál bele rezulta edifísiu foun nu’udar onra ida boot tebes, ba entidade hotu inklui estudante sira,” nia dehan.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here