Traballadór sira hatun foos iha Portu Dili. Imajen Tatoli/António Gonçalves.

DILI, 03 fevreiru 2022 (TATOLI) – Sentru Lojístika Nasionál (CLN, sigla portugés) prepara ona foos tonelada rihun tolu atu halo distribuisaun faze daruak ba família kbiit laek iha territóriu nasionál.

Prezidente CLN, Gervásio Cardoso de Jesus da Silva, informa dadaun ne’e tékniku sira simu ona lista hosi Ministériu Koordenadór ba Asuntu Ekonómiku (MKAE) ne’ebé konklui ona rekollamentu dadus iha munisípiu hotu-hotu no benifisiáriu iha territóriu nasionál hamutuk rihun 50-resin.

CLN lideradu Gervásio Cardoso de Jesus da Silva fahe ona foos ba ema rihun 32 iha faze primeiru, agora simu ona lista benefisiáriu ne’e kuaze rihun 50, no konfirma ona ho Ministériu Koordenadór ba Asuntu Ekonómiku atu distribui munisípiu hotu-hotu.

Prezidente CLN, Gervásio Cardoso da Silva de Jesus. Imajen Tatoli/Sérgio da Cruz.

“Kuandu sira fornese dadus, semana oin ne’e ami orienta kompañia distribuidór hein ba fahe foos tonelada rihun-tolu ne’e iha munisípiu hotu,” Eis deputadu iha lejizlatura 2002-2007 ne’e informa ba Agência Tatoli, iha kna’ar-fatin, Bebora, Dili, kinta ne’e.

Foos lokál tonelada rihun-tolu ne’e CLN sosa hosi grupu agrikultór sira iha territóriu nasionál liuhosi fornesedór Timor-oan 200-resin ne’ebé governu kontrata iha tinan 2021 liubá.

Kona-ba mekanismu distribuisaun, CLN kontrata ona empreza internasionál ida hosi Austrália mak mobiliza karreta tula foos iha kontainer ba munisípiu hotu-hotu no koordena ho parte autoridade lokál sira nune’e prosesu distribuisaun la’o-tuir dadus ne’ebé iha.

Eis deputadu lejizlatura dahuluk ne’e fó-sai katak, iha tinan kotuk governu prevee ona millaun $4-resin hosi fundu Covid-19 hodi halo akizisaun ba foos importadu hamutuk tonelada rihun-50.

Daudaun ne’e hare-kulit tinan kotuk sei falta tonalda 864.997-resin mak sei iha hela armazein CLN Maliana no Natarbora, tanba ne’e bainhira foos importadu ne’ebé governu sosa iha tempu badak seidauk to’o iha Timor-Leste, entaun sei halo prosesamentu hare-kulit hirak-ne’e hodi responde ba situasaun emerjénsia.

Maibé ba iha tinan ne’e, CLN prevee tán millaun $5 sosa produtu lokál hosi grupu agrikultór sira iha territóriu nasionál nune’e bele motiva agrikultór sira badinas halai natar no halo to’os nune’e bele hasa’e kuantidade produtu agríkola iha rai-laran atubele minimiza produtu importasaun.

Bainhira CLN sosa hotu ona produtu lokál sira sei lori produtu hirak-ne’e ba asegura iha armazein Bebora, Tibar, Maliana, Natarbora no Baucau atubele halo prosesamentu hodi responde preukupasaun komunidade nian.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here