Prezidente Komisaun Funsaun Públika (KFP), Faustino Cardoso. Imajen António Gonçalves.

DILI, 03 fevreiru 2022 (TATOLI)—Prezidente Komisaun Funsaun Públika (CFP, sigla portugés), Faustino Cardoso, hateten KFP seidauk iha baze legál implementa politíka reforma tanba laiha artigu atu obriga funsionáriu Parlamentu Nasionál prepara proposta halo altersaun ba lei.

Notísia Relevante: Governu aprova programa reforma administrasaun públika 

“Ha’u la dekor ema na’in hira mak idade reforma ona tanba ema barak maibé 2000-resin ona. Dezde implementa lei Seguransa Sosiál hahú hosi tinan 2016 ema lubun ida mak hato’o ona rekerimentu ba reforma, maibé laiha baze legal atu obriga funsionáriu sira atu reforma,” Prezidente KFP, Faustino Cardoso, informa ba Agência Tatoli iha nia knaar fatin, Matadouro , kinta ne’e.

Implementasaun Politíka reforma ba funsionáriu sira, oras ne’e daudaun Parlamentu Nasionál prepara proposta alterasaun lei númeru 12/2016 kona-ba segurasan sosiál nian, atu hodi hatama artigu obrigatóriu ida ba ema sira-ne’ebé atinje ona idade 60 ba leten bele tama ona iha reforma

Se bainhira seidauk iha artigu ida hateten obrigatóriu funsionáriu sira-ne’ebé mak atinje ona idade 60 atu goza sira-nia pensaun, maibé depende ba rekezitu ka rekerimentu individuál, KFP servisu hamutuk ho Intitutu Nasionál Seguransa Sosiál (INSS) prosesa pensaun.

Aleinde KFP prosesa pensaun sei hasai sertifikadu kona-ba ninia atividade servisu, ninia saláriu sei haruka ba iha INSS hodi bele halo kalkulasaun ba montante osan reforma ne’ebé nia iha direitu tuir situasaun ema ida-idak nian.

Dadus funsionáriu 2000-resin mak haruka ona rekerimentu ba KFP ne’ebé hahú implementa lei Seguransa Sosiál iha tinan 2016.

Enkuantu Lei númeru 12 /2016, 14 de Novembru, kona-ba Rejime Kontributiva Seguransa Sosiál implementa ne’ebé nia regulamentu sira promulga iha 19 maiu 2017.

Dezde tinan 2008, Governu dezenvolve no implementa ona asaun protesaun sosiál, programa no medida protesaun sosiál lubuk liuhosi pilar asisténsia sosiál.

Rejime ne’e, funsiona ho kontribuisaun traballadór no entidade sira empregadór sira tantu hosi setór privadu no setór públiku, ho nune’e hodi kontribui osan ba karteira komun ida no karteira komun ida-ne’e sei la jere hamutuk ho Orsamentu Gerál do Estadu nian.

Bazea ba Dekretu Lei Nú. 12 /2016, 14 de Novembru, traballadór sei kontribui 4%, no entidadade empregadór sira sei kontribui 6%.

Atu jere osan ne’e, Ministériu Finansa iha ona akordu ho Ministériu Solidariedade Sosiál no Inkluzaun (MSSI) hodi kria konta ketak ida-ne’ebé sei jere hosi Ministériu Solidariedade Sosiál.

Jornalista : Celestina Teles

Editór       : Cancio  Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here