Diretora Programa Nasionál Dezenvolvimentu Suku (PNDS), Claudina Soares Pinto. Imajen TATOLI/Osória Marques.

DILI, 02 fevereiru 2022 (TATOLI)—Diretora Programa Nasionál Dezenvolvimentu Suku (PNDS), Claudina Soares Pinto, informa konstrusaun Uma Kbiit Laek (UKL) ba ema kbiit laek ba tinan 2022 ne’e Sekretariadu Tékniku Programa Nasionál Dezenvolvimentu Suku (PNDS) prepara hela no tama ona ba faze preparasaun ba dezeñu Planta no Kadernu Enkargu ka Bill of Quantities (BoQ).

“Ba UKL tinan ne’e nian ami tama ona siklu preparasaun ba dezenu Planta no Kadernu Enkargu (BoQ) nian no balun iha ona siklu peskiza nian,” Diretora PNDS, Claudina Soares Pinto ba Agência TATOLI, via telefónika, kuarta ne’e.

Nia dehan PNDS nia atividade la’ós haree de’it konstrusaun fíziku maibé PNDS la’o tuir etapa ida ba etapa seluk no PNDS la’o tuir siklu implementasaun nian.

“Ami laheree ba implementasaun fíziku maibé ami la’o tuir siklu implementasaun 12 no daudaun ne’e ami tama ona ba siklu preparasaun dezeñu Planta no Kadernu Enkargu (BoQ),” nia dehan.

Diretora ne’e haklaken, PNDS la’ós implementa de’it maibé hanorin oinsá kapasita no hasa’e komunidade nia konsementu no fó formasaun atu bele jere programa ne’e ho susesu.

Antes ne’e Ministru Administrasaun Estatál (MAE), Miguel Pereira de Carvalho, hateten iha tinan fiskál 2021 MAE liuhosi PNDS konstrui Uma Kbiit Laek (UKL) hamutuk 1.254, ne’ebé nia progresu iha munisípiu hotu la’o di’ak no hetan apresiasaun boot hosi komunidade ne’ebé hetan benefísiu direta.

Nune’e mós, ita tina kotuk Parlamentu Nasionál, kinta (09 dezembru 2021), aprova orsamentu $63,600.000 ba tinan fiskál 2022 hodi konstrui Uma Kbi’it Laek (UKL) 10 kada suku iha territóriu nasionál iha debate espesialidade ba proposta lei Orsamentu Jerál Estadu 2022 ho rezultadu votasaun a-favór 47, kontra 0 no abstensaun 13.

“Nune’e, importante tebes Governu nia tulun diretamente ba populasaun liu-liu iha suku no aldeia ne’ebé merese hetan atensaun hosi Estadu. Tanba ne’e, ami hakarak hasae tan envez uma tolu maibé uma 10 kada suku nune’e proposta ne’e pasa Governu konkorda liu-liu oinsa hadi’a mekanizmu implementasaun,” Deputadu proponente, Francisco de Vasconselos hateten iha plenária.

Proposta númeru 54 mosu hafoin komisaun rona esplikasaun hosi Ministru Administrasaun Estatál (MAE) kona-ba ajuda harii uma ba ita-nia populasaun sira-ne’ebé laiha kbiit, maibé programa ne’e konsta kedas iha Planu Estratéjiku Dezenvolvimentu Nasionál (PRDN) 2011-2030 ne’ebé rekuñese povu Timor-Leste nia aspirasaun atu kria nasaun ida-ne’ebé forte, prosperu no moris di’ak ba sidadaun.

Iha programa VIII Governu Konstituisionál prioritiza kona-ba abitasaun no bainhira Governu define atividade ne’e ho objetivu prinsipál garante moris di’ak sidadaun nian kontribui ba redús ki’ak.

Tanba ne’e, nia dehan, iha tinan uluk Governu deside kada suku konstrui uma tolu maibé haree implementasaun mezmu ho aplikasaun Estadu emerjénsia ninia ezekusaun to’o hotu.

Proposta númeru 54 títulu (Servisu/Órgaun) MAE, kategória despeza transferénsia públika ho programa kódiku 025 kona-ba desentralizasaun administrativa no podér lokál, dotasaun inisiál $21.118.045 ho alterasaun aumenta $63,600.000, nune’e dotasaun finál sa’e ba $84,718,045.

Orsamentu ne’e tau iha programa desentralizasaun administrativu no podér lokál, sub-programa dezenvolvimentu lokál ho atividade jestaun Programa Naisonál Dezenvolvimentu Suku (PNDS)

Justifikasaun propoin aditamentu rubríka transferénsia públika $63,600.000 ba kontinuasaun programa Uma Kbiit Laek (UKL) ba konstrusaun uma 10 kada suku iha territóriu benefisíu direta kada munisípiu.

Proposta alterasaun ne’e implika aumenta montante totál despeza OJE no mós implika aumenta fundu petrolíferu trata iha artigu 17 iha proposta lei OJE.

Proposta ne’e mai hosi Francisco de Vasconselos, Abel Pires da Silva, António Verdiál de Sousa, Maria Angélica Rangel no Antoninho Bianco.

Ministru Administrasaun Estatál (MAE), Miguel Pereira de Carvalho, hateten iha tinann fiskál 2021 MAE liuhosi PNDS konstrui UKL hamutuk 1254, ne’ebé nia progresu iha munisípiu hotu la’o di’ak no hetan apresiasaun boot hosi komunidade rasik hetan benefísiu direta.

Tan ne’e, iha tinan 2022, Governu liuhosi Ministéiru Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan ida-ne’e.

“Deputadu sira propoin tan osan hamutuk $63,600.000 hodi MAE liuhosi PNDS bele implementa Uma Kbiit La’ek iha 2022, aumenta uma 10 kada suku nune’e Governu prontu atu implementa programa ida ne’e,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here