Koordenadór ekipa susesu kandidatu independente Rogério Tiago Lobato, Mateus Maia de Jesus. Imajen Tatoli/Natalino Belo.

DILI, 02 fevereiru 2022 (TATOLI) – Rogério Tiago Lobato, kuarta ne’e rejista ona Tribunál Rekursu (TR) nu’udar kandidatu independente ho apoiante na’in-6.410 hodi kompete iha eleisaun prezidensiál ne’ebé sei realiza iha loron 19 marsu tinan ida-ne’e.

Koordenadór ekipa susesu kandidatu independente Rogério Tiago Lobato, Mateus Maia de Jesus, fó-sai katak, dokumentu hotu-hotu submete ona ba Tribunál Rekursu.

“Loron ida ohin mai rejista ona ami-nia kandidatura independente Rogério Tiago de Fatíma Lobato ba kandidatu Prezidente Repúblika 2022-2027,” Portavós Mateus ko’alia iha Tribunál Rekursu, Kaikoli, Dili, kuarta ne’e.

Apoiante ba kandidatura mai hosi 12 munisípiu no RAEOA ne’ebé kada munisípiu hamutuk na’in-500 ho totál hamutuk na’in-6.410.

Rogério Lobato deside kandidata-aan hodi kompete iha eleisaun prezidensíal tanba hanesan lideransa 1975 no prontu kontribui ikus ba nasaun Timor-Leste.

“Hanesan jerasaun tuan hakarak husik hela ninia istória ba jerasaun foun iha futuru mai,” Mateus akresenta.

Nia dehan, prinsípiu hosi kandidatu Rogério Lobato mak hakarak estadu Timor-Leste iha ekonomia no edukasaun di’ak hodi garante estabilidade defeza no seguransa nasaun nian.

Mateus hatutan, lema ba kampaña mak moris di’ak ba povu nune’e ekipa susesu garante povu sei fó konfiansa ba kandidatura independente Rogério Tiago Lobato iha eleisaun prezidensíal iha marsu 19.

Jornalista         : Natalino Belo

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here