Mariano Assanami Sabino. Imajen/Antonio Goncalves.

DILI, 03 fevereiru 2022 (TATOLI) –  Apoiante na’in-10.567 hosi munisípiu 12 no Rejiaun Administrativa Espesiál Oé-Cusse Ambeno (RAEOA) rejista ona kandidatu Mariano Assanami Sabino iha Tribunál Rekursu hodi kompete iha eleisaun prezidensiál ne’ebé sei realiza 19 marsu tinan ida-ne’e.

Prezensa kuadru polítiku PD nian lidera hosi Sekretáriu Jerál António da Conceição akompaña ho ekipa sussesu to’o oha edifísiu Tribunál Rekursu tuku 14:00 lokraik.

Hafoin rejista, Sekretáriu Jerál PD António da Conceição ‘Kalohan’, fó-sai katak Assanami sei kompete iha eleisaun prezidensiál períodu 2022-2027.

Portavós ekipa susesu no atual Sekretáriu Jerál Partidu Demokrátiku (PD), António da Conceição “Kalohan”, dadalia ho jornalista sira hafoin ba rejista Assanami Tribunal Rekursu. Imajen TATOLI/Egas Cristóvão.

“PD mai ofisializa ona rejistu kandidatu Prezidente Mariano Assanami Sabino nu’udar kandidatu ne’ebe ami deside ona liuhosi konvensaun,” nia ko’alia iha Tribunál Rekursu, Kaikoli, Dili.

Nia fó-sai katak, dokumentu hotu-hotu ekipa sussesu submete ona ba Tribunál Rekursu no hein de’it notifikasaun hosi Tribunál, karik iha rekizitu balun ne’ebé tribunál sei presiza.

Dokumentu ne’ebé aprezenta ba Tribunál Rekursu kompostu hosi kartaun aseitasaun kandidatu nian, karta reprezentante kandidatu nian, lista asinatura hosi apoiante no eleitorál hosi apoiante ne’ebé mai hosi munisípiu 12 no RAEOA.

Sekretáriu Jerál PD ne’e rasik fiar-aan Assanami sei kompete ho kandidatu sira seluk iha eleisaun prezidensiál períodu 2022-2027 tanba konsidera nu’udar partidu polítiku ne’ebé eziste ona durante tinan 20.

“Mais preparadu ba batalla ne’ebé mai,” António akresenta.

Nia dehan, preparasaun mak funsionamentu mákina partidu nian sai determinante no konfiansa hosi povu ba kandidatura Assanami Sabino tanba entre kandidatura hotu atuál Prezidente PD nu’udar jerasaun foun ne’ebé preparadu.

Antes ne’e, PD liuhosi konvensaun partidu deside hili atuál Prezidente Partidu Demokrátiku, Mariano Assanami Sabino nu’udar kandidatu hosi partidu nian hodi kompete iha eleisaun prezidensiál.

Jornalista         : Natalino Belo

Editór               : Evaresto Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here