Diretór Servisu Edukasaun Baucau Augosto Ornai Ximenes. Imajen TATOLI/Natalino Belo

DILI, 01 fevereiru 2022 (TATOLI)–Diretór Servisu Edukasaun Baucau, Augosto Ornai Ximenes, hateten, daudaun ne’e realiza kompetisaun desportiva entre estudante eskola ensinu sekundáriu jerál no tékniku vokasionál, ho objetivu atu buka fini no halo selesaun ba jogadór iha rejiaun ne’e.

“Kompetisaun ne’e ho modalidade hamutuk tolu, kompostu hosi futeból 11 ba mane, volleyból no atletizmu ba mane no feto,” Diretór Servisu Edukasaun Baucau informa ba Agência TATOLI, via telefónika, tersa ne’e.

Jogu eskolár ne’e finansia hosi Sekretaria Estadu Juventude no Desportu (SEJD) ho fundu $28.500, ne’ebé iha loron 28 janeiru hahú ona abertura faze apuramentu ba kada postu.

Enkuantu, totál eskola ne’ebé daudaun ne’e partisipa iha nível apuramentu hosi postu administrativu neen hanesan Baucau villa hamutuk 10, Baguia rua, Quelicai tolu, Laga rua, Vemasse rua no Venilale tolu, nune’e hamutuk 22.

“Hosi apuramentu hotu, eskola ne’ebé sai vensedór hosi postu mak ikus mai sei reprezenta iha jogu nível munisipál, ne’ebé sei realiza iha loron 07 fevereiru,” Augosto Ornai akresenta.

Sistema jogu ne’e mak halo selesaun uluk hosi eskola sekundáriu no tékniku vokasiónal tuir kada postu administrativu no sei reprezenta eskola hodi kompete iha nível munisipál.

Kada postu administrivu lima hanesan Baguia, Laga, Quelicai, Vemasse no Venilale sei reprezenta eskola ida no postu Baucau villa mak sei reprezenta eskola tolu, nune’e totál ekipa ka eskola ualu mak sei kompete.

Jogu eskolár nível munisipál sei utiliza stádiu Tadeu Lacana ba futeból no modalidade volleyból sei utiliza jináziu (GOR) iha Villa nova bainhira abertura to’o meius finál no finál, enkuantu ba jogu faze selesaun sei utiliza kampu futeból Triloka.

Tuir planu iha futuru, SEJD sei kria kompetisaun deportiva entre eskolár nível sekundáriu no tékniku vokasionál kada munisípiu iha territóriu nasionál, nune’e kompetisaun ne’e hanesan parte ida atu halo preparasaun no halo selesaun ba jogadór sira iha munisípiu Baucau atu hasoru kompetisaun eskolár iha nível nasionál.

Jornalista : Natalino Belo

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here