Plenária Parlamentu Nasionál. Imajen Tatoli/António Gonçalves.

DILI, 31 janeiru 2022 (TATOLI)—Reprezentante povu iha uma fukun Parlamentu Nasionál husu Ministériu Saúde atu intensifika fumigasaun ka regra susuk iha territóriu nasionál hodi halo prevensaun ba moras dengue.

Notísia Relevante: MS kontinua esforsu halo asaun prevensaun kombate dengue iha TL

“Prevensaun ne’e ita-nia fallansu boot ida. Ha’u fó ezemplu iha ha’u-nia viziñu rasik iha Comoro, labarik ida mate iha loron 31 foin ba halo fumigasaun. Ita haree de’it ninia períodu loron sanulu laiha asaun ne’e halo oinsá mak kazu labele sa’e makaas. Ida-ne’e realidade, laiha prevensaun ne’ebé mak efeitu. Tan ne’e, husu Governu liu-liu ministériu Saúde atu intensifika  fumigasaun ne’e presiza halo iha territóriu tomak,” Deputada Frente Mudansa, Isabel Freitas Ximenes, levanta iha Parlamentu Nasionál bainhira hala’o debate ho Ministra Saúde, iha sala plenária, segunda ne’e.

Nune’e mós Deputadu CNRT, Arão Noé, husu Ministériu Saúde atu sériu foti asaun prevensaun la’ós kazu barak mak foin foti asaun, tan ne’e presiza halo fumigasaun ativu iha bairru sira iha Dili laran.

Prezidente Grupu Mulher Parlamentár Timor-Leste (GMPTL), Lidia Norberta, informa tuir vizita ne’ebé GMPTL hala’o direta hodi observa iha Hospitál Nasionál Guido Valadares (HNGV), Sentru Saúde Formosa no izolamentu Vera Cruz hatudu moras dengue afeta tebes ba populasaun liu-liu ba labarik sira.

Nune’e, nia rekomenda ba parte ministériu saúde atu halo prevensaun hodi halo fumigasaun iha bairru sira, fornese moskitéiru ba populasaun ne’ebé halo konsulta, no intensifika sensibilizasaun kona-ba moras dengue ba populasaun sira.

Nia husu autoridade lokál hamutuk ho komunidade servisu hamutuk hodi kontribui oinsá halo limpeza jerál iha bairru laran ho uma sira, nune’e labele fó fatin ba susuk hodi moris.

Aleinde ne’e, nia dehan, rezultadu observasaun hatudu ekipamentu presiza aumenta oxijéniu, ventiladór, kama no ekipamentu médiku regula soru been ba pasiente nia isin no aumenta mákina reajente ida, kama, aimoruk no hadia haris-fatin iha sentru saúde Formoza.

“Tanba ne’e, husu atu fornese fasilidade hodi ajuda fó atendimentu adekuadu ba pasiente,” nia hateten.

Durante fiskalizasaun nota katak, espasu iha HNGV labele akumula pasiente no kama ida bele labarik na’in-rua ka tolu mak toba hamutuk.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here