Atividade labarik sira iha Merkadu Taibesi, Labarik sira ne'e lori bote lao tama sai Merkadu Taibesi hodi buka lata mamuk hodi hili. Imajen Tatoli/Antonio Goncalves.

DILI, 31 janeiru 2022 (TATOLI)–Koordenadór Projetu MAP16 ILO, Jacinto da Silva Caldas Belo, hateten Ministru Prezidénsia Konselu Ministru (MPKM) apoiu atu ratifika konvensaun konvensaun diálogu sosiál liu-liu konvensaun144 no konvensaun 190 kona-ba violénsia no asediu iha mundu traballu ne’ebé aprezenta hosi Organizasaun Internationál Labour Organization (ILO).

“Ami mai enkontru hodi aprezenta konvensaun diálogu sosiál, konvensaun 144, konvensaun 190 kona-ba violénsia no asediu iha mundu traballu partikularmente iha servisu fatin no konvensaun 138 konvensaun ILO ni’an ne’ebé ko’alia kona-bá idade mínimu ba admisaun iha merkadu traballu,” Koordenadór Projetu MAP16 ILO, Jacinto da Silva Caldas Belo, hateten ba jornalista sira hafoin enkontru ho Ministru Prezidensia konselu Ministru, iha Palásiu Governu, segunda ne’e

Objetivu hosi enkontru ne’e hodi husu apoiu hosi Governu Timor-Leste atu ratifika  konevensaun tolu, ne’ebé aprezenta hosi Organizasaun Internasionál ILO.

Durante enkontru ne’e, Ministru Prezidensia Konsellu Ministru, Fidelis Manuel Leite Magalhães konsidera asuntu ne’e tanba pertinente ba Timor-Leste nia situasaun, nune’e lori Governu nia naran kompromisu hodi fó apoiu ba asuntu refere.

“Ami kontente tebe-tebes tanba Ministru Prezidensia Konsellu Ministru, Fidelis Manuel Leite Maglhães konsidera asuntu ne’e tanba pertinente ba Timor-Leste no nia apoiu asuntu ne’e,” nia dehan.

Aleinde aprezenta kovensaun aprezenta mós asuntu kona-ba planu asaun nasionál traballo Infantil iha Timor-Leste tanba sai hanesan problema nasionál labarik barak mak gasta tempu iha estrada sira-nia tempu uitoan de’it iha atu ba eskola.

“Aproveita oportunidade ne’e ami mós aprezenta asuntu ida kona-ba aprovasaun planu asaun nasionál traballu infantil iha Timor-Leste. Hanesan ita hotu hatene traballu infantil sai hanesan problema nasionál, tanba labaraik barak mak gasta tempu barak liu iha lurón no iha tempu uitoan de’it atu ba eskola,” nia hateten.

Bazea ba planu hosi organizasaun Internasionál ILO iha ona programa espsífiku ba traballu infantil, prevensaun no eliminasaun traballu infantil iha 2027 ne’ebé ILO halo kooperasaun ho Governu Timor-Leste liuhosi SEFOPE, MKAE, no iha nivél tékniku.

“Ita servisu hamutuk ho Inspesaun Jerál Traballu no ita iha ona komisaun Nasionál Kontra Traballu Infantil ne’ebé estebelese iha tinan 2014 liuhosi dekretu Governu. Ita halo esforsu hotu hodi elimina no kombate traballu infantil iha Timor-Leste to’o 2025,” nia dehan.

Tanba ne’e, oras ne’e daudaun ILO iha ona planu asaun nasionál, maske seidauk hetan aprovasaun, nune’e ohin ILO aprezenta ba Ministru Presidénsia Konsellu Ministru.

“Ita iha ona planu asaun nasionál traballu infantil, infelizmente seidauk hetan aprovasaun. Tanba ne’e mak ohin ami mai hodi husu apoiu ba Ministru Presidénsia Konsellu Ministru. Ita espera iha tinan ida ne’e Governu belé halo ona aprovasaun ba konvensaun internasionál tolu ne’e,” nia dehan.

Jornalista : Celestina Teles

Editór      : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here