Isabel da Costa Ferreira ofisialmente deklara ninia kandidatura Prezidente Repúblika ba públiku sai kandidatu indepedente. Imajen Tatoli/Nelson de Sousa.

DILI, 31 janeiru 2022 (TATOLI)—Isabel da Costa Ferreira, segunda ne’e ofisialmente deklara ninia kandidatura Prezidente Repúblika ba públiku sai kandidatu indepedente hodi kompete iha eleisaun prezidensiál 2022 ne’ebé tuir kalendáriu sei realiza iha 19 marsu.

Notísia Relevante: Kandidatu Hermes Barros no Isabel Ferreira rejista iha Tribunál Rekursu

Isabel da Costa Ferreira deklara nia kandidatura ho lema “Mai ita hamutuk iha mehi ida de’it ba pás, estabilidade no moris di’ak”, atu sai ativista ba povu lian laek.

“Ohin, ha’u anunsia publikamente kandidatura ba Prezidente Repúblika Demokrátika Timor-Leste ba periódu 2022-2027. Ha’u aprezenta kandidatura nu’udar ativista direitu fundamentál sira tanba fiar iha importánsia sidadania ida, ativa, esklaresida, interesada no partisipativa, individuál ka organizadu em-favór ba kauza boot polítika no sosiál ne’ebé mak presiza atu luta. Se ita hakarak harii Timor-Leste ida ne’ebé di’ak, modernu, solidáriu, voluntáriu, tolerante no pasífiku liután. Ha’u kandita an ba PR atu sai ativista ba povu kbiit laek sira,” Isabel Ferreira deklara liuhosi konferénsia imprensa ba jornalista sira iha edifísiu Sidadania Colmera.

Nia ezerse direitu hodi kandidata-an no hetan eleitu nu’udar sidadaun timor-oan responsavél no konsiente ba nia direitu maibé mós konsiente ba nia devér sira ho família ho komunidade no nasaun.

Nia aprezenta kandidatura ida ne’e nu’udar inan, feen no membru família boot timor-oan sira nian ho espíritu serbisu dedikasaun no sakrifísiu tuir valór sira-ne’ebé aas liuhosi umanizmu kristaun no doutrina sosiál igreja nian.

Ne’ebé, nia foti pozisaun em-favór ba dezenvolvimentu kresimentu no progresu saudável nasaun nian, ho nia eransa ne’ebé ema hotu hakarak husik hela ba jerasaun tuir mai.

Aprezentasaun kandidatura ida-ne’e nu’udár profisionál no jurista tanba fiar katak konstrusaun sosiedade ida ekonomikamente justu no sosialmente ekitativa depende ba ema-nia serbisu empeña esforsu hamutuk em-favór ba moris-di’ak no ba monitorizasaun konstante ba administrasaun justisa nian.

“Ikus liu nu’ udar kandidatura ida independente, aberta no apartidária iha nia orijen, ne’ebé konvida ba mobilizasaun esforsu no vontade sira aseita no hamahon ema hotu-hotu,” nia hateten.

Nune’e, sei partilla mehi ida de’it kona-ba modernu no dezenvolvidu ho sidadaun ne’ebé preparadu di’ak, kualifikadu di’ak hodi aproveita oportunidade tomak hosi edukasaun, formasaun no kresimentu, la haree ba sira-nia kondisaun sosiál, orijen etno-jeográfika, ka sira-nia konsiénsia polítika no reljioza.

“Kandidatura ida-ne’ebé konsiente ba responsabilidade no ba espetativa boot ne’ebé mak nasaun hatuur iha funsaun prezidensiál,” nia afirma.

Isabel Ferreira, hateten Prezidente Repúblika responsabilidade espesiál ida mak reprezenta Estadu iha relasaun internasionál no iha konsertasaun ho Governu, garante unidade no Independénsia nasionál sai fatór ba koezaun no uniaun ba timor-oan sira tomak.

PR asume papél nu’udar Komandante Supremu FALINTIL-Forsa Defeza Timor-Leste nian no finalmente responsabilidade hodi sai garante ikus ba funsionamentu regular ita-nia instituisaun demokrátika sira.

Nia informa, ninia kandidatura rejista ona iha Supremu Tribunál Justisa (STJ) ho apoiante rihun lima (5) tuir lei haruka.

“Tanba ne’e, ha’u hanesan kandidatu independente laiha partidu ida mak apoiu maibé hanesan sidadaun timor-oan sira-ne’ebé iha mós partidu sira bele tau fiar manifesta nia apoiu, ba ha’u nakloke,” nia dehan.

Nune’e iha prosesu demokrátiku sidadaun hotu iha interese atu kandidata an, tanba ne’e ninia preparasaun ba kandidatura prontu kompete no depende ba povu mak sei determina sé mak di’akliu, tanba importunate liu mak hahalok no kompromisu.

Prezidente Repúblika

Iha Konstituisaun RDTL, Artigu 74 (Definisaun), iha alinéa 1 hateten Prezidente Repúblika mak Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár.

Iha alinéa haktuir, PrezidenteRepúblika maka Komandante A’asliu (supremu) Forsa Armada nian.

Iha Artigu 75 (Elejibilidade), iha alinea 1 haktuir; Bele tuir kandidatura ba Prezidente Repúblika sidadaun timor-oan sira-ne’ebé, iha ilas hotu tuirmai ne’e:

  1. a) Sidadaun nanis;
  2. b) Iha tinan mínimu 35;
  3. c) Ho kapasidade di’ak;
  4. d) Ne’ebé hetan proposta husi sidadaun hili-na’in mínimu nain rihun lima (5000).

Iha alinéa 2 hateten, Prezidente Repúblika kaer mandatu to’o tinan lima nia laran no ninia knaar remata bainhira Prezidente foun simu pose.

Alinéa 3 haktuir, Prezidente Repúblika nia mandatu bele hetan renovasaun dala-ida de’it.

Kona-ba eleisaun, iha Artigu 76 (Eleisaun), iha alinbéa 1 hateten; Atu sai Prezidente Repúblika, sei hili tuir sufrájiu universál, livre, diretu, sekretu no ida-idak.

Iha alinéa 2 dehan, Eleisaun Prezidente Repúblika nian banati tuir sistema manán ho votu barakliu hosi votu hotu-hotu ne’ebé válidu, la sura votu ne’ebé la válidu.

Alinea 3 haktuir, bainhira kandidatu sira hetan votu hanesan, sei hala’o fali eleisaun dala ida tán, liutiha loron tolunulu (30) hosi loron votasaun ida foin liubá kotuk.

Iha alinéa 4 hateten, iha eleisaun daruak, kandidatu na’in-rua ne’ebé hetan liu votu no la hasai sira-nia kandidatura mak bele tuir.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here