Atleta Timór-oan Imbrolia Amorin. Imajen/espesial

DILI, 31 janeiru 2022 (TATOLI)— Federasaun Taekwondo Timor-Leste (FTTL), hili atleta Timór-oan Imbrolia Amorin, tama lista selesaun nasionál atu kompete iha SEA Games, fulan-maiu iha Vietname.

Imbrolia Amorin hanesan feto ida ne’ebé berani envolve-an iha modalidade Taekwondo. Nune’e iha tinan 2019, konsege hamorin Timor-Leste nia naran iha SEA Games, iha Filipina tanba hetan medalla osan mean.

“Ha’u gosta atividade desportu hotu, maibé ha’u nia laran monu ba Taekwondo, Nune’e, ha’u esforsu partisipa iha SEA Games hodi hatudu prestasaun ne’ebé di’ak hodi hamorin Timor-Leste nia naran iha mundu,” Atleta Imbrolina ne’e hateten ba Agência TATOLI iha edefísiu SEJD-Dili, foin lalais ne’e.

Notísia relevante:  FTTL prepara atleta na’in-hitu bá kompete iha SEA Games

Alteta ne’ebé moris iha Dili iha loron 16 novembru 1997 no oan hosi Afonso Amorin no Isabel de Araujo ne’e, dehan  nia partisipasaun iha SEA Games tinan ne’e, la halo promesa oi-oin, maibé sei hatudu jogu ne’ebé di’ak atu oferese rezultadu di’ak ba povu no nasaun Timor-Leste.

“Ha’u tama Taekwondo laiha obrigasaun hosi ema ruma hanesan família sira laiha, ida ne’e hosi ha’u nia-an rasik, tanba antes tama Taekwondo ha’u mós partisipa iha atividade barak desportu nian hanesan atividade kapueira ne’ebé atividade desportu hotu di’ak, maibé Taekwondo mak monu ona ba ha’u nia laran,” nia akresenta.

Atleta Timór-oan Imbrolia Amorin. Imajen/espesial

Nune’e, FTTL hahú halo preparasaun másimu ba fíziku no tékniku ba atleta iha Tibar hodi partisipa iha eventu internasionál ne’e.

“Ami nia preparasaun masimu ona, tanba hahú novembru tinan kotuk kedas, durante ne’e ami treinu kada loron hahú hosi segunda to’o sábadu, lokoraik hahú tuku 06:00 to’o ramata, iha Tibar,” nia afirma.

Hetan ona Medalla osan mean

Amorin envolve iha modalidade Taekwondo hahú tinan 2006 ho idade sia, maibé la tauk hodi fó an tomak ba treinu.

Iha envolvimentu ne’e la hela de’it ho naran, maibé fó biban ona ba nia hodi partisipa iha eventu nasionál no internasionál barak, liuliu iha tinan 2011 mai leten, Imbrolia Amorin komesa hetan oportunidade barak hodi partisipa iha eventu sira rai laran hanesan kampionatu nasionál Taekwondo, Korea Festival, Timor open inklui Sea GamesTaekwondo Championship, ne’ebé konsege hatudu rezultadu di’ak.

“Eventu barak mak ha’u tuir hanesan iha rai laran no rai li’ur, maibé eventu ida ne’ebé nuudar feto Timoroan primeiru hetan no iha ha’u nia moris sei la haluhan mak Sea Games 2019 liubá iha Filipina ne’ebé konsege hetan medalla osan mean hodi oferese ona ba nasaun,” nia akresenta.

Ho esperiénsia naton ne’e fó konfiansa tebes ba Imbrolia hodi hatudu dala ida tan iha Vietname no harakak mantein nafatin títulu ne’ebé antes ne’e hetan ona.

Sea Games tinan ne’e sei hala’o iha Vietname hahú 12 to’o 24 maiu no modalidade Taekwondo sei reprezenta atleta na’in hitu, kompostu mane haat no feto tolu.

Atleta hirak ne’e mak hanesan, José da Costa, Ronavio da Cruz, Giovanio Pinto, Ana da Costa, Evalinda de Jesus no Imbrolia Amorin.

Notísia relevante:   Alteta timór-oan hosi modalidade hitu prepara kompete iha SEA Games  

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here