iklan

NASIONÁL, INTERNASIONÁL, HEADLINE, KAPITÁL

ILO aprezenta asuntu tolu ba PCM

ILO aprezenta asuntu tolu ba PCM

Ministru Prezidénsia Konsellu Ministru, Fidelis Manuel Leite Magalhães, konvoka reuniaun ho ekipa ILO, iha Palásiu Governu, segunda (31/01). Imajen TATOLI/Egas Cristóvão

DILI, 31 janeiru 2022 (TATOLI)—Ekipa hosi Internasional Labour Organization (ILO), segunda ne’e, aprezenta asuntu balun ba Ministru Prezidénsia Konsellu Ministru (PCM, sigla portugés), Fidelis Leite Magalhães, relasiona ho traballu infantil.

Koodenadór Nasionál ba Traballu Infantil, Jacinto da Silva. Imajen TATOLI/Egas Cristóvão

“ILO hanesan organizasaun traballu, ne’ebé ami aprezenta asuntu tolu ba Governu Timor-Leste atu ratifika hanesan, dahuluk konvensaun 141 kona-ba diálogu sosiál, konvensaun 190 kona-ba violénsia asédiu iha mundu traballu, partikulamente serbisu fatin, no konvensaun 138 ILO nian ne’ebé ko’alia kona-ba idade mínimu admisaun ba mundu traballu,” Koodenadór Nasionál ba Traballu Infantil,  Jacinto da Silva, hateten, iha Palásiu Governu.

Notísia relevante: Traballu infantil aumenta, MSSI husu PN aselera lei protesaun labarik

Koordenadór ne’e konsidera, asuntu tolu ne’e pertinente tebes ba Timor-Leste, tanba ne’e halo konsulta ho PCM atu lori ba iha Konsellu Ministru atu debate hodi hetan aprovasaun.

Ministru Prezidénsia Konsellu Ministru, Fidelis Manuel Leite Magalhães, hasai foto hamuk ho ekipa ILO, hafoin reuniaun iha Palásiu Governu, segunda (31/01). Imajen TATOLI/Egas Cristóvão

Biban ne’e, ekipa mós aproveita aprezenta asuntu planu asaun nasionál trabllau infantil.

“Iha Timor-Leste hanesan, ema hotu hatene katak traballau infantil sai ona hanesan problema, tanba labarik barak mak gasta tempu iha luron hodi hala’o serbisu no iha tempu oituan de’it ba eskola. Ha’u hakarak atu hato’o peskiza ILO iha tinan 2016, ne’ebé rezultadu hateten katak labarik maizumenus 60.000 mak agora ativamente iha vida ekonomia ka apoia inan-aman buka osan,” nia relata.

Hosi númeru 60.000, iha 52.000 ka 12% mak konsidera hanesan traballu infantil, katak tuir organizasaun internasionál, labarik sira ne’e hela iha estrada ka luron hodi fa’an sasan durante sira-nia oras tomak.

“Asuntu ne’e ami hato’o ona ba Ministru PCM, ne’ebé Ministru apresia tebes no kompremete apoia asuntu ida-ne’e, ne’ebé espera tinan ne’e bele hetan ona rezultadu,” nia akresenta.

Nune’e, mekazimu ne’ebé ILO uza espesífiku ba programa traballu infantil no prevensaun ka eliminasaun traballu infantil iha Timor-Leste mak iha tinan 2027 ne’e, ILO sei halo kooperasaun ho Governu Timor-Leste liuhosi Sekretariu Estadu Formasaun no Empregu (SEFOPE) no Ministériu Koordenadór Asuntu Ekonómiku (MKAE), inklui nível tékniku hodi serbisu hamutuk ho Inspesaun Jerál Traballu.

“Ita iha Komisaun Nasionál Kontra Traballu Infantil, ne’ebé estabelese ho dekretu Governu iha tinan 2014. Konvensaun ne’e eziste hamutuk ho parseiru hodi halo esforsu hotu elimina no kombate traballu infantil,” nia dehan.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!