Imajen/ Espesial

DILI, 31 janeiru 2022 (TATOLI) –  Hospital Referál Oé-Cusse (HRO) iha Rejiaun Administrativa Espesiál Oé-Cusse Ambeno (RAEOA) rejista kazu dengue rua (2) ne’ebé daudaun ne’e baixa hela iha ospitál enklave ne’e.

Xefe Departamentu Moras Kontajioza no La’ós Kontajioza iha Sekretaria Rejionál ba Asuntu Sáude, Patrício da Costa, informa, tuir loloos serbisu saúde rejista kazu tolu, labarik na’in-rua no adultu ida, maibé labarik ida rekupera ona.

HRO rejista pasiente adultu ne’e iha loron-kuarta ne’e kona kazu moras dengue iha Sentru Saúde Baoknana, suku Bene-Ufe, sub-rejiaun Nítibe, no iha loron-kinta rejista tán pasiente moras dengue labarik na’in-rua (2) hosi bairru Palaban, ida tinan hitu (7) no ida seluk tinan tolu (3).

“Maibé labarik ida di’ak ona, hela labarik na’in-ida no adultu idade 36 mak baixa hela iha Hospital Referénsia Oé-Cusse,” Patrício da Costa, informa ba Agência Tatoli liuhosi telefónika, segunda ne’e.

Nia fó-sai katak, entre kazu tolu (3) ne’e, ekipa saúde halo ezaminasaun liuhosi laboratóriu nia rezultadu hatudu pozitivu sofre moras dengue, entaun ekipa saúde tún kedas halo investigasaun no rega susuk iha fasilidade saúde Baoknana no hela-fatin pasiente nian.

“Kona-ba estoke ai-moruk, iha ospitál sufisiente bele atende pasiente sira bainhira afeta kazu dengue,” nia fó-sai.

Nune’e atu evita kazu ne’e, nia apela ba komunidade hotu iha REAOA atu koopera malu, hamoos ambiente uma-laran, hamoos vazu ai-funan, lata mamuk no hamoos fatin ne’ebé bee nalihun iha iha uma oin.

Tan ne’e, daudaun ne’e parte saúde RAEOA, prepara estratéjia atu forma ekipa saúde, komposta hosi departamentu promosaun sei halo sensibilizasaun ba komunidade sira iha teritóriu Oé-Cusse, nune’e bele oinsa proteze-an hosi moras dengue, inklui rega susuk ba fatin hirak ne’ebé sai risku ba moras ne’e.

Entretantu, tuir dadus nasionál hosi saúde públika liuhosi Departamentu Vijilánsia Epidemiolojia iha Ministériu Saúde (MS), daudaun ne’e rejista kazu dengue iha Timor-Leste hamutuk 1.198 no hosi númeru ne’e iha labarik na’in-20 mak lakon ona vida.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan