Veteranu sira, bainhira partisipa loron desmobilizasaun iha komemorasaun loron FALINTIL iha 2011. Foto António Gonçalves

DILI, 31 janeiru 2022 (TATOLI)—Prezidente Konsellu Kombatentes Libertasaun Nasionál (CLN-sigla portugés), Vidal de Jesus ‘Riak Leman’ hateten, CCLN sei transfere osan $2,500 ba kada postu administrativu iha munisípiu sira hotu hodi selebra loron nasionál veteranu ne’ebé monu iha 03 marsu ho atividade isar bandeira.

Notísia Relevante: Loron Nasionál Veteranu fó esperansa ba jerasaun foun sira

 “Isar bandeira iha kada munisipiu ne’e importante, nune’e bele mobiliza ita-nia veteranu sira hotu iha postu administrativu bele partisipa iha loron veteranu ne’e. Ida-ne’e mak ami hakarak hodi organiza no mobiliza veteranu sira atu sira bele hatene no sente mós loron veteranu nian tanba tinan-tinan selebrasaun ne’e hala’o de’it iha nasionál,” Riak Leman hateten ba Agência TATOLI, via telefónika, segunda ne’e.

Orsamentu ba selebrasaun loron nasionál veteranu ne’e, daudaun ne’e sei iha Ministériu Asuntu Kombatente Libertasaun Nasionál (MAKLN) entaun seiduak bele transfere.

Bainhira MAKLN transfere ona mak CCLN transfere ona iha postu administrativu sira tanba foin dadauk mak asina akordu ho Ministru Asuntu Kombatente Libertasaun Nasionál (MAKLN), Júlio Sarmento da Costa ‘Meta Malik’, iha sesta (28/01) ne’e, entaun parese iha semana oin ne’e osan ne’ebé foti hosi transferénsia públiku ne’e bele tama ona iha konta bankária CLN nian, nune’e bele transfere tutan ba iha postu administrativu sira halo preparativu.

Iha estatutu órganiku CCLN nian, Númeru 7/2018, 28 marsu, tuir natureza ne’ebé temi iha artigu 3 estatutu ne’e dehan katak CCLN hanesan asosiasaun públika ida, ne’ebé kria tuir podér públiku ne’ebé intergra iha administrasaun autonoma Estadu hodi dezempeña nia tarefa própria relasiona ho interrese kombatente, rekoñese tuir estatutu kombatente libertasaun nasionál.

Riak Leman hateten, orsamentu ne’ebé iha atu hala’o servisu tuir planu ne’ebé konsellu kombatente iha, nune’e orsamentu ne’e sei aloka ba Konselhu munisipál sira atu bele ezekuta orsamentu ne’e ho responsabilidade, nune’e hodi ezekuta programa hosi konsellu veteranu sira iha Munisípiu 13.

Tuir artigu 6, responsabilidade CCLN sei halo relatóriu trimestrál tuir planu finansa Orsamentu Jerál Estadu (OJE), CCLN ba tinan 2022 ne’ebé aprova hosi prezidente administrasaun CCLN atu apoiu finanseiru ba aplikasaun hosi akordu transferénsia públika ne’e, hodi asegura hosi MAKLN liuhosi transferénsia públika ho montante $1,642,986,28, fahe ba bens servisu $1,490,026,28 no ba kapitál menor ho montante $152,960,00.

Loron 3 fulan-marsu hetan duni rekoñesimentu hanesan Loron Nasionál Veteranu sira nian, tanba iha loron 03 marsu hanesan loron ne’ebé hala’o Konferénsia Nasionál FRETILIN nian dahuluk, hosi harii Conselho Nacional da Resistência Timorense, no hili Xanana Gusmão hanesan Komisáriu Polítiku FRETILIN no Komandante FALINTIL nian.

Notísia Relevante: 3 Marsu, Loron Reestruturasaun Rezisténsia Armada

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here