Susuk Dengue.Imajen/TATOLI

DILI, 31 janeiru 2022 (TATOLI) – Servisu Saúde Munisípiu Bobonaro rejista kazu dengue na’in-26 no hamate ona labarik na’in-ida iha fulan janeirru ne’e.

Xefe Ekipa Promosaun Saúde Munisípiu Bobonaro, Zil Bernardo Vicente, informa kazu hirak-ne’e ekipa vijilánsia epidemiolojia deteta pasiente sira ne’ebé hala’o tratamentu  iha sentru saúde Atabae na’in-ida, Balibo na’in-ida no restante iha Hospitál Referal Maliana (HRM).

“Agora daudaun munisípiu Bobonaro iha ona kazu dengue 26. Hosi númeru ne’e labarik mane tinan 12 mate iha semana rua liubá, nia hela iha aldeia Rokon, suku Odomau, postu administrativu Maliana Vila,” nia informa ba Agência TATOLI liuhosi telefónika, segunda ne’e.

Bazea ba dadus ne’ebé ekipa vijilansia relata, fatin ne’ebé risku ba moras dengue mak iha suku Holsa, Odomau área Gunahan, Maravilha, Rokon no fatin sira seluk tán.

Haree ba dadus kazu dengue  kontinua rejista kada-loron, daudaun ne’e pesoál saúde sira tún ona ba terrenu fahe ‘abate’ ba komunidade afetadu sira atu tau iha tanki bee-moos laran, nune’e bele hamate susuk Aides-gaeptis nia tolun no halo  fomigasaun ho ai-moruk kímiku hodi oho susuk boot sira-ne’ebé tata komunidade sira iha tempu loron. Abate ne’e nu’udar larvisida ne’ebé forte liu hodi kontrola susuk.

“Ami husu ba komunidade sira-ne’ebé afetadu sira importante liu mak halo maneira prevensaun sira hanesan limpeza jerál iha idak-idak nia uma oin, uma laran no uma ninin sira-ne’e, nune’e bele kontribui hamenus moras dengue iha ita nia munisípiu,” nia apela.

Ba oin pesoál saude sira mós sei halo promosaun saúde ba moras dengue iha postu administrativu sira seidauk afetadu hanesan, Bobonaro, Cailaco no Lolotoe, atu konsensializa komunidade sira hamoos ambiente uma oin.

“Ami halo promosaun hotu fahe kedas abate  no haree mak iha área sira-ne’ebé mak ladún moos ne’e ita sei halo mós fomigasaun tanba agora ita-nia ai-moruk kímiku iha servisu saúde Bobonaro sei sufisiente hala atu rega tama sai bairu-bairu,” nia katak.

Dadus nasionál hosi saúde públika liuhosi Departamentu Vijilánsia Epidemiolojia iha Ministériu Saúde (MS), daudaun ne’e rejista kazu dengue iha Timor-Leste hamutuk 1.198 no hosi númeru ne’e iha labarik na’in-20 mak lakon ona vida.

Jornalista         : Sergio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here