Padre Bento Baros, dirije misa agradesimentu hodi komemora aniversáriu Ajénsia TATOLI,I.P nian ba-dala V iha Kapela Aimutin, Dili, tersa (27/07). Imajen Tatoli/Francisco Sony.

DILI, 31 janeiru 2022 (TATOLI)-Diretór Nasionál Institutu Misaun Pontifísia iha Timor-Leste, Pe. Bento Barros Pereira, hateten misaun prioridade ne’ebé nia hala’o hafoin simu responsabilidade hosi vatikanu mak Obra Misionária ba Propagasaun Fé, Obra Misionária ba knaar São Pedro Apostolu nian, Obra Misionária ba Santa Infánsia no União ba obra Misionária ba Nai Lulik sira.

“Obra Misionária ba Propagasaun Fé ne’e katak atu halekar ka haburas liután servisu fiar nian ka evanjelizasaun, Obra Misionária Santa Infánsia ne’e liga liubá labarik sira, obra misionária ba knar São Pedro nian no União Misionáriu ba Nai Lulik Sira ne’e mak tama iha ida de’it ne’ebé mak ita dehan Obra Misionária Pontifisia Timor-Leste,” Pe. Bento Barros Pereira hateten ba Agência Tatoli, iha nia knaar-fatin, Catedrál, Díli, segunda ne’e.

Hosi ne’e, ninia pontu sentrál iha evanjelizasaun e’ebé igreja hotu-hotu halo hela, hanesan ema hotu-hotu bainhira simu knaar ida atu ba haklaken ka ba halo evanjelizasaun.

Nomeasaun ida-ne’e ba knaar ho durasaun tinan lima (5) tanba iha tinan 10 liubá Pe. Mouzinho Pereira Lopés mak hala’o hela knaar ne’e, tanba nia tempu hotu ona entaun nomeia fali nia atu hala’o servisu ida-ne’e.

Nune’e, dezde nomeiasaun ne’e nia bele hala’o ona servisu maibé prátikamente agora sei iha hela preparasaun sira, tanba sei iha hand over ofisiálmente hosi Diretór Nasionál anteriór hodi mai fali Diretór Nasionál atuál iha Konferénsia Episkopál Timorense ni’an. 

Hosi nomesaun ne’e, Pe. Bento Barros Pereira sente kontente simu misaun ne’e tanba misaun ida-ne’e boot liután fali misaun ida-ne’ebé nia halo hela, entaun naturálmente nia kontente tanba nia hala’o hela misaun ida-ne’ebé nia simu hosi Nai Jesus Kristu hodi bele lori duni buat ne’ebé mak Santa Kreda ka Santa Sé tau konfiansa ba nia hala’o.

“Ha’u sei hakaas an atu oinsá koordena didi’ak servisu ida-ne’e ba nivél nasionál Timor nian, tanba iha kada Dioseze iha Diretór ba Obra Misionáriu Pontifisiá,” nia dehan.

Nia sei hakas an atu koordena ho diretór sira no rona mós amu bispu sira hodi bele hala’o servisu ne’e, mezmu servisu ida-ne’e independentemente hosi sira hotu maibé tenke rona nafatin no servisu hamutuk ho sira atu nune’e servisu ne’e bele ba oin.

Entretantu, Pe. Bento Barros Pereira durante ne’e hala’o knaar hanesan Diretór Departamentu Komunikasaun Arquedioseze Dili no hanorin mós iha Institutu Superiór Filosófia, hanorin mós iha Institutu Superiór São Francisco de Sales iha Comoro no iha tinan balun hanorin iha Universidade Nasionál Timor Lorosa’e (UNTL).

Pe. Bento Barros Pereira simu ordenasaun nu’udar Nai Lulik iha 06 agostu 2008 no iha iha loron 13 dezembru 2021, Vatikanu Kardinál Luis Antonio G. Tagle, Prefeitu Kongresaun Evanjelizasaun ba Povu, nomeia Pe. Bento Barros Pereira nu’udar Diretór Nasionál Institutu Misaun Pontifísia iha Timor-Leste, ba períodu tinan lima hahú hosi 2021 to’o 2026.

Jornalista : Nelia Fernandes

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here