Ekipa konjunta servisu sekreta hosi Polísia NasionálTimor-Leste (PNTL) no FALINTIL-Forsa Defeza Timor-Leste (F-FDTL), kaptura ona suspeitu AB ne’ebé oho vítima NS iha nia rezidénsia Aimutin. Imajen/Mídia PNTL.

DILI, 30 janeiru 2022 (TATOLI)—Ekipa konjunta servisu sekreta hosi Polísia NasionálTimor-Leste (PNTL) no FALINTIL-Forsa Defeza Timor-Leste (F-FDTL), kaptura ona suspeitu ba kazu omesídiu ne’ebe akontese ohin dadeer iha área Tasi-Tolu Masilidun, aldeia 12 Outubru, suku Comoro, postu administrativu Don Aleixo, munisípiu Dili.

Xefe Ekipa Operasaun no Xefe Sub-Servisu Externa Servisu Informasaun Polísia (SIP), Asistente Inspetór Polísia, Nelson Herculano, hateten ekipa konjunta konsege kaptura suspeitu AB ne’ebé oho vítima NS iha nia rezidénsia Aimutin.

“Ohin tuku 07h00 dadeer, ita ekipa konjunta SIP no SIM (Servisu Informasaun Militar) kaptura ona suspeitu ho inisiál JD alias AB ne’ebe halai sees hosi lokál krime mai iha Aimutin, tanba komete kazu omesídiu ne’ebé hamate matebian NS alias A iha área Tasi-Tolu iha tuku 04h00 dader ne’e,” Nelson Herculano hateten liuhosi Komunikadu Imprensa ne’ebé Agencia Tatoli asesu, domingu ne’e.

Hafoin akontesimentu família evakua kedas vítima NS ba kareta kamioneta ida lori ba Hospitál Nasional Guido Valadares (HNGV) maibé lakonsege salva tanba antes to’o iha ospitál ne’e raan sai barak liu ona.

“Tuir kronólojia festa-na’in hanesan mós sasin haktuir katak, kazu ne’e akontese iha serimónia kore-metan família uma mane no mane foun nian iha Tasi-Tolu, no suspeitu ho nia grupu tama ba tenda laran halo konfrontu hodi hamate matebian ho tudik,” nia dehan.

Oras ne’e daudaun suspeitu iha ona Polísia Nasionál Serbisu Investigasaun Kriminál (PNSIK) nia liman hodi halo investigasaun, enkuantu vítima ne’ebé mate agora daudaun sei iha mortuáriu Hospitál Nasionál Guido Valadares hodi halo prosesu autópsia.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here