DILI, 29 janeiru 2022 (TATOLI) – Ekipa Planu Nasionál Dezenvolvimentu Suku (PNDS) Munisípiu Viqueque hala’o sensibilizasaun Uma Kibiit Laek (UKL) tinan 2022 nian komunidade sira iha suku Bibileo, postu administrativu Viqueque Vila, munisípiu Viqueque.
Objetivu hosi programa ne’e ba komunidade sira kona-ba UKL hodi bele hetan aldeia alvu ne’ebé benefisiáriu no programa PNDS nian hanesan reabilitasaun sede suku, bee-moos faze datoluk iha siklu IV.
“Ami halo sensibilizasaun ba implementasaun UKL ba tinan 2022, atu hetan lista benifisiáriu kada aldeia alvu sira. Bainhira hetan ona lista ami sei foti levantamentu dadus no halo verifikasaun ba komunidade sira-ne’ebé sai hetan benefisiáriu,” Enjiñeiru PNDS Munisípiu Viqueque, António da Silva, inform aba Agência TATOLI liuhosi telefónika, sábadu ne’e.
Antonio hatutan, tinan 2022 suku Bibileo sei hetan UKL hamutuk uma unidade 12, kada aldeia ida sei hetan uma tolu no programa Reabilitasaun Sede Suku (RSS) no bee-moos ba komunidade Bibileo.
Alokasaun orsamentu 2022 ba programa dada bee-moos iha suku ho totál orsamentu hamutuk $ 40.000, aloka ba operasionál montante $3.000, ba infraestrutura hamutuk $37.000 no orsamentu ba RSS totál hamutuk $2.000, no orsamentu alokasaun faze normál ba iha PNDS Suku Bibileo nian totál hamutuk $ 45.000.
Iha tinan 2021 munisípiu Viqueque hetan UKL hamutuk unidade 108 ne’ebé halo iha suku 36 orsamentu totál hamutuk rihun $ 51 inklui suku Bibileo iha aldeia Ai-Sane ne’ebé atinji ona 85%.
Programa PNDS ne’ebé antes ne’e implementa iha suku Bibileo hanesan projetu dada bee-moos hamutuk posu ualu, eskola pre-eskolár, salan profesór no moru protesaun ba ensinu báziku Bibileo ho totál orsamentu rihun $100.
Reprezentante Xefe Suku Bibileo, Vasco Soares, hateten, durante ne’e autoridade lokál akompaña implementasaun projetu PNDS iha suku Bibileo la’o di’ak fó duni benefísiu ba komunidade sira.
“Ami husu agradese ba VIII Governu Konstitusional lideradu Primeiru Ministru (PM) Taur Matan Ruak, no husu atu mantein nafatin programa sira-ne’e,” nia hato’o.
Enkuantu suku Bibileo iha aldeia ualu kompostu hosi Hare-oan, Fato-hossan, We-bae, Mane-klaran, Ai-sahe, Amarleza, Lacu-ai no Balide-oan ho totál populasaun hamutuk 3.205 ne’ebé kompostu hosi mane 1.645 no feto 1.560.
Jornalista : Vitorino Lopes da Costa
Editór : Evaristo Soares Martins
