Prezidente Repúblika (PR), Francisco Guterres Lú Olo. Imajen Tatoli/Egas Cristóvão.

DILI, 29 janeiru 2022 (TATOLI) – Movimentu Jerasaun Kontinuador FRETILIN (MOJEKOF) deklara apoia kandidatu Francisco Guterres ‘Lú Olo’ kontinua kompete iha eleisaun prezidensiál ne’ebé realiza iha 19 marsu tinan ida-ne’e.

“Ami nu’udar jerasaun foun ne’ebé halibur-aan iha Movimentu Jerasaun Kontinuadór Fretilin analiza katak ita-nia Prezidente Repúblika atuál Francisco Guteres ‘Lú Olo’ nu’udar poténsia di’ak ida entre sidadaun sira seluk hodi kontinua kandidata-aan dala-ida tán tuir konstituisaun haruka. Tanba ami haree iha duni kapasidade,” Sekretáriu Jerál MOJEKOF, Faustino Soares, deklara liuhosi konferénsia imprensa, iha salaun Luz Clarita, Dili, sábadu ne’e.

Movimentu ne’e observa katak Lú-Olo  iha duni kapasidade ne’ebé hatudu pontu sira hanesan hatene interpreta konstituisaun RDTL no lei oan sira, hatene serbisu ekilibriu ho titulár órgaun soberanu sira seluk.

Nune’e mós hatene  tau aas interese nasionál no bein-estar komún, la halis ba interese partikulár hosi líder polítiku ka organizasaun ne’ebé de’it, família nian ka interese pesoál.

Lú Olo hatudu ona iha prova katak pás no estabilidade nu’udar baze ba haburas dezenvolvimentu nasionál, valoriza veteranu no kombatente nasionál, tau aas populasaun feto nu’udar rin importante ne’ebé tanen família no sosidade organizada.

Movimentu ne’e mós haree katak Lú Olo asume prezidénsia repúblika barani foti dezisaun ba defende interese povu no nasaun nian, hatudu konsisténsia no independénsia iha tempu ne’ebé de’it, hatene halo ema hotu sente na’in ba rai  ida-ne’e liuhosi diálogu.

Nune’e mós hatene tetu situasaun konflitu ho laran hakmatek no rezolve liuhosi diálogu ho parte hotu-hotu, hatene hasoru dezafiu ne’ebé de’it ho pasiénsia no kalma.

Movimentu ne’ebé lidera hosi Faustino Soares nota katak, durante ne’e Prezidente Repúblika Francisco Guteres Lú Olo uza nia knaar influénsia ko’alia beibeik ho Governu, no ikus mai konsege atu reativa hikas fali arte-marsiál ne’ebé durante ne’e taka.

Nune’e iha loron 23 dezembru 2021 liubá, membru no kuadru MOJEKOF hamosu rezolusaun liuhosi kongresu dahuluk hodi fó apoiu totál ba kandidatura Prezidente Repúblika Franscisco Guterres  ba periódu 2022-2027.

“Apela dala-ida tán ba membru no kuadru MOJEKOF sira hotu iha territóriu nasionál no diáspora kontinua serbisu maka’as hodi fó vitória ba ita-nia kandidatura Francisco Guterres ba periódu  2022-2027,” nia apela.

Jornalista         : Nelson de Sousa

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here