Majór Jenerál Lere Anan Timur. Imajen Tatoli/António Gonçalves

DILI, 29 Janeiru 2022 (TATOLI) – Lere Anan Timur deklara husik ona militár no oras ne’e preparadu rejista iha Supremu Tribunál ba Justisa (STJ) hodi kompete iha eleisaun prezidensiál ne’ebé sei realiza iha loron 19 marsu 2022.

“Ohin, ha’u deklara ba públika katak, ha’u kandidatu-aan ba Prezidente Repúblika iha eleisaun prezidensial, 19 marsu 2022 nu’udar kandidatu independente.  Ha’u agradese ba Prezidente Repúblika tanba horisehik (sesta) aprova ona ha’u-nia pedidu ezonerasaun iha vida militár. Apartir horisehik sai jenerál reformadu ho fitun tolu. Maibé sei hetan fitun ida sai fitun haat ne’e regra,” Jenerál reformadu ne’e deklara liuhosi konferénsia imprensa, iha ninia rezidénsia, Praia dos Coqueiros, Dili, sábadu ne’e.

Nia katak, data rejistrasaun ba Supremu Tribunál ba Justisa (STJ) ne’e jurista sira maka responsavél, maibé data finál rejista kandidatu remata iha loron 4 fulan-fevereiru.

“La to’o loron 4 fulan-fevereiru sei hatama lista kandidatura ba Tribunál Rekursu (Supremu Tribunál ba Justisa) tanba buat hotu preparadu hotu ona, hein ba hatama lista kandidatura,” Lere hateten.

Lere hateten, militante ne’e apoia ba eleisaun prezidensiál agora hamutuk rihun 20 ne’ebé mai hosi juventude, ferik, katuas, veteranus no organizasaun rezisténsia sira.

“Ha’u kadidatu-an ba Prezidente Republika, ha’u lori veteranu  no rezisténsia sira hotu nian naran. Ha’u FRETILIN maibé la’ós FRETILIN maka kandidatu, ha’u FRETILIN no povu barak mate ba FRETILIN inklui ha’u-nia família mós mate ba FRETILIN, ha’u-nia raan fakar ba FRETILIN. FRETILIN nu’udar aman ba partidu hotu,” nia akresenta.

Forsa polítika ne’ebé apoia Lere kompete iha eleisaun prezidensiál mai hosi militante partidu Congresso Nasionál Reconstrução de Timorense (CNRT), Partidu Demkratiku (PD), militante FRETILIN, Kmanek Haburas Unidade Nasional Timor Oan (KHUNTO) , Frente Revolusionária Timor Leste Independente (FRETILIN), Partidu Libertasaun Populár (PLP), no Partidu Os Verdes De Timor.

“Bainhira ha’u sai prezidente, hau sei marka diferensa. Diferente mak ha’u hautan saida mak sira halo tiha ona, hau sei kurije no troka buat-ne’ebé sala.  Ita-nia hakarak mak estabilidade hodi lori povu ba moris di’ak,” Lere hateten.

Lere hatutan, durante tinan 47 serbí ona ba estadu Timor Leste no harii nasaun Timor-Leste hamutuk ho maluk sira seluk ne’ebé rihun ba rihun fakar raan no balun ne’ebé sei moris.

“Ohin, ha’u sente livre ona tanba ha’u durante tinan 47 serbí estadu Timor Leste, serbí militár to’o ona tempu ha’u deskansa.  Ha’u-nia tinan mós to’o entrega ba jerasaun foun sira. Tanba ita ema serbisu rua serbí ba estadu.  Ha’u-nia riku la’ós osan, ha’u-nia riku maka serbí, ha’u sei bele hodi serbí estadu no serbí bei-oan sira,” nia hateten.

Notisia relevante: PR ezonera Lere no nomeia Falur ba Xefe Estadu Maiór Jenerál

Jornalista         : Vitorino Lopes da Costa/Natalino Costa

Editór               : Evaristo Soares Martins

PUBLISIDADE HUSI MTCIiklan

1 KOMENTÁRIU

  1. Ba hau apoio kandidatu “Lere” tamba lider ida nebe mak nia maturidade politika kapas tebes, serbe duni para sai Presidente da republika

Leave a Reply to ALEXANDRE DOS SANTOS Cancel reply

Please enter your comment!
Please enter your name here