Governu Austáalia no UNICEF oferese vasina Pfizer BioNTech hamutuk doze 259.740 ba Governu Timor-Leste. Imajen Tatoli/Nelsion Sousa.

DILI, 29 janeiru 2022 (TATOLI) – Governu Austrália no Fundu Nasaun Unida ba Labarik (UNICEF, sigla inglés), oferese vasina Pifizer BioNTech hamutuk doze 259.740 ba Governu Timor-Leste.

Vasina  ne’e transposta ho aviaun TRI-M.G Ásia Airlines to’o iha aeroportu internasionál Nicolau Lobato, Comoro, sabádu ne’e.

“Lori Governu no povu Timor-Leste nia naran hakarak agradese ba apoiu tomak hosi Governu Austrália no UNICEF ninia tulun iha  luta kontra COVID-19,” Vise Ministru Negósiu Estranjeiru no Kooperasaun (MNEK), Julião da Silva, hateten iha nia diskursu iha ámbitu simu vasina ne’e iha aeroportu, Comoro, sábadu ne’e.

Enkarregada Embaxadora Austrália iha Dili, Suzanne Wilson-Uilelea, informa, Governu Austrália liuhosi  UNICEF halo esforsu hodi lori vasina Pifizer 259.740 mai Timor-Leste. Doze vasina hirak-ne’e hola parte hosi númeru vasina doze 1.260.090 ne’ebé kompromete ona atu apoia Timor-Leste liuhosi UNICEF. No vasina  Pfizer ne’e hodi bele vasina labarik sira idade 12 to’o 18.

“Apoiu  ida-ne’e hanesan kontribuisaun hodi haforsa ami-nia komitmentu ba apoia Timor-Leste hodi luta hasoru COVID-19. Nune’e importante tebes ema hotu hetan vasina hodi proteje-aan, família, komunidade no nasaun hosi COVID-19,” nia hateten.

Governu Australia mós oferese ona vasina AstraZeneca ho doze 777.850 ba Timor-Leste. No orsamentu millaun 3,5 dolár Austrália ba parseiru dezenvolvimentu iha área saúde sira inklui UNICEF no OMS hodi apoia programa implementasaun ba vasinasaun iha Timor-Leste.

Iha fatin hanesan, Reprezentante UNICEF iha TL, Bilal Durrani, orgullu tebes parseria ho Governu Austrália no TL atu hatán ba COVID-19.

UNICEF ho Austrália dezempeña papél krítiku hodi apoia Governu Timor-Leste no Ministériu Saúde hodi hatán ba COVID-19 nomoos implementasaun vasinasaun COVID-19.

UNICEF garante entrega vasina Pfizer sira tuir nia tempu loloos, akizisaun, distribuisaun, formasaun kadeia malirin iha SAMES rejionál no armazein sira, materiál informasaun foka ba labarik sira, inan-aman sira no manorin sira, advokasia no eventu sensibilizasaun iha eskola idak-idak no apoia ona asaun preparatoria inklui apoia ba formasaun pesoal saúde  sira.

Diretór  Gabinete Polítika Planeamentu Kooperasaun Ministériu Saúde, Narciso Fernandes fó-sai katak, alvu ne’ebé iha sei vasina  labarik rihun 200 estudante no labarik hirak-ne’ebé la eskola iha Timor-Leste maibé  ho vasina ne’ebé to’o ona sei fó fazeadamente.

Jornalista         : Nelson de Sousa

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here