Manan-na’in dahuluk ba hakerek istória ka aiknanoik iha dalen Makasae, Zacarias Augustu Freitas (hamriik iha liman-karuk). Imajen/Espesiál.

DILI, 28 janeiru 2022 (TATOLI)—Sala Leitura Xanana Gusmão (SLXG), kinta (27/01) ne’e atribui prémiu no sertifikadu apresiasaun ba mananna’in hakerek istória ba labarik sira iha kompetisaun hakerek  iha lian Makasae no Baiqueno tinan 2021-2022.

Notísia Relevante: SLXG realiza kompetisaun hakerek istória iha lian Makasae no Baiqueno

Hakerek-na’in no manan-na’in dahuluk ba hakerek istória ka aiknanoik iha dalen Makasae, Zacarias Augustu Freitas, sente orgullu ba inisiativa hosi Sala Leitura Xanana Gusmão (SLXG) ne’ebé organiza kompetisaun hodi fó oportunidade ba estudante no juventude sira-ne’ebé hatene ko’alia dalen Makasae no Baiqueno hodi bele partisipa iha kompetisaun hakerek istória ba labarik sira ne’e.

Sala Leitura Xanana Gusmão (SLXG) atribui prémiu no sertifikadu apresiasaun ba manan-na’in sira. Imajen/Espesiál.

“Ha’u sente orgullu tebes ho konkursu ida-ne’e, tanba bele fó oportunidade ba ami hodi kolekta no hakerek istória sira tantu istória fiksaun no aiknanoik iha ami-nia lian rasik. Ida-ne’e, ha’u sente buat ida importante tebes tanba liuhosi oportunidade sira hanesan ne’e, ita bele prezerva no promove itania lian inan sira. Aleinde liuhosi konkursu ida-ne’e mós ami konsege aprende buat foun barak iha prosesu hotu-hotu, liu-liu oinsá halo peskiza, rekolla informasaun no aprende kona-ba metódu hakerek kreativu sira,” nia hateten liuhosi komunikadu imprensa ne’ebé Agência Tatoli asesu, sesta ne’e.

Tanba ne’e, nia rekomenda ba Sala Leitura Xanana Gusmão no Governu Victoria Austrália kontinua servisu hamutuk atu organiza konkursu hakerek ne’e kada tinan ho lian inan (lokál) oioin iha Timor-Leste, nune’e bele prezerva no promove lian inan no istória lokál sira atu labele lakon no jerasaun futura bele aprende.

Ofisiál Projetu Sala Leitura Xanana Gusmão (SLXG), Jeronimo Fernandes, hateten atribuisaun prémiu no sertifikadu apresiasaun ba autór istória sira-ne’e nu’udar rekoñesimentu ida ba sirania esforsu no vontade hodi koolabora iha prosesu inísiu kolekta no hakerek istória to’o iha faze selesaun finál.

“Ohin, ita atribui prémiu no sertifikadu apresiasaun ba itania autór istória sira, hanesan rekoñesimentu ida hosi Sala Leitura Xanana Gusmão ba sira-nia esforsu no badinas durante kolekta no hakerek istória hahú hosi inísiu to’o iha faze selesaun finál. Ohin, ita mós asina akordu kontribuisaun ida ho itania autór istória sira ho objetivu atu nafatin koolabora hamutuk hodi hatán ba nesesidade servisu balun iha faze tuir mai hanesan produsaun livru, gravasaun audio, video animasaun no ikus liu faze lansamentu livru ne’ebé ita sei halo iha tempu badak,” Jeronimo Fernandes hateten.

Antes ne’e, iha tinan 2021, Sala Leitura Xanana Gusmão (SLXG) hetan fundu hosi Governu Victoria Austrália hodi organiza kompetisaun hakerek istória ba labarik pré-eskolár sira iha lian Makasae no Baiqueno.

Relasiona ho kompetisaun ida-ne’e, komisaun organizadora hahú halo anúnsiu públiku iha loron 23 Agostu 2021 to’o loron 31 Dezembru 2021. Nune’e, iha faze ida-ne’e, estudante, juventude no komunidade hosi lian Makasae no Baiqueno ne’ebé gosta hakerek konsege kolekta sira-nia istória popular sira no submete ba komisaun organizadora iha Sala Leitura Xanana Gusmão (SLXG).

Faze kolekta istória SLXG termina tiha iha 31 dezembru 2021, hafoin ne’e konsege rekola istória sira hamutuk 25 ne’ebé kompostu hosi istória ho dalen Makasae 18 no Baiqueno hitu (7), ne’ebé SLXG rekolla hosi komunidade lian Makasae no Baiqueno, liu-liu estudante no juventude sira ne’ebé iha munisípiu nomós sira-ne’ebé hela iha Dili.

Hafoin SLXG kollekta istória hamutuk 25 ne’e, komisaun organizadora halo selesaun no istória sira ne’ebé haree di’akliu hodi hili tau hamutuk no istória hirak ne’e mak sei uza ba produsaun livru.

Iha faze selesaun ne’e, SLXG hili istória hamutuk 12 mak konsidera di’akliu, kompostu hosi istória Makasae neen (6), Fiksaun tolu (3) no Aiknanoik tolu (3), nune’e mós ba istória ho dalen Baiqueno hamutuk neen (6), Fiksaun tolu (3) no Aikanoik tolu (3).

Entretantu, totál kompetitór ba kompetisaun hakerek istória iha lian lokál Makasae no Baiqueno ba tinan 2021-2022 ne’e hamutuk 25 no hosi kompetisaun ne’e Zacarias Augostu Freitas hetan primeiru lugar, Basílio M. da Costa sai segundu lugar no Atanasio Correia sai manan-na’in ba datoluk (terseiru lugar iha iha istória aiknanoik lian Makasae.

Nune’e mós ba istória fiksaun lian Makasae, Sonia Soares hetan primeiru lugar, Nelvia Agostinha sai segundu lugar no Bernardo da S. de Andrade hetan terseiru lugar.

Entretantu manan-na’in ba istória aiknanoik lian Baiqueno ne’e, Paulino Cono Falo hetan primeiru lugar, Selviana da Costa Elu sai segundu lugar no Orlando R. de. F. Neno manan terseiru lugar lugar.

Enkuantu ba istória fiksaun lian Baiqueno ne’e, Serafina T. Besa hetan primeiru lugar, Gregorio Cono Falo sai segundu lugar no Alarico Tout hetan terseiru lugar.

Notísia Relevante: Livru “Konta Istória iha Lian Mambae” prezerva lian-inan sai identidade orijen

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here