asesta
Autoridade lokál (xefe suku no xefe aldeia) sira baimhira partisipa iha enkontru ne’ebé STAE no CNE konvoka kona-ba funsionmentu sentru votasaun paralelu, sesta (28/1/2022). Imajen TATOLI/António ‘Dasiparu’ Gonçalves.

DILI, 28 janeiru 2022 (TATOLI)—Direitór Jerál Sekretariadu Tékniku Administrasaun Eleitorál (STAE), Acilino Manuel Branco, husu autoridade lokál atu fó apoiu másimu ba prosesu eleitorál liu-liu iha sentru votasaun paralelu no ninia mekanizmu sira.

Eleisaun atu susesu ne’e mós la’ós dependénsia de’it ba órgaun eleitorál sira tanba prosesu eleitotrál ne’e mós involve sidadaun sira no presiza involementu hosi xefe suku no xefe aldeia sira oinsá mak bele garante sidadaun nia direitu votu iha eleisaun.

Diretór Jerál STAE, Acilino Manuel Branco. Imajen TATOLI/António ‘Dasiparu’ Gonçalves.

“Ohin ita konvida autoridade lokál iha kapitál Dili tanba ami sei implementa prosesu ne’ebé foun mak sentru votasaun paralelu nia mekanizmu sira-ne’e, sei involve entidade relevante hanesan Komisaun Funsaun Públika, Ministériu Edukasaun Juventude no Desportu (MEJD), Ministéiru Ensinu Superiór Siénsia no Sekretáriu Estadu Ambiente no Kultura (SEAK) inklui xefe suku sira,” Diretór Jerál STAE hatete ba jornalista sira, iha salaun Laline, CNE, Dili.

Sorumutu ida-ne’e ho intensaun oinsá atu garante implementasaun prosesu sentru votasaun paralelu ho susesu presiza halo sensibilizasaun depois apoiu órgaun eleitorál, nune’e sidadaun sira hatene nia mekanizmu oinsá bele partisipa hodi ezerse sira-nia direitu votu iha tempu eleisaun.

Prezidente Comissão Nacional de Eleição (CNE-sigla portugés), José Agostinho da Costa Belo, informa estabelesimentu sentru votasaun paralelu ne’e atu fó atendimentu ba sidadaun sira-ne’ebé maihosi munisípiu liu-liu estudante sira-ne’ebé hela iha Dili inklui sira-ne’ebé akompañia moras iha ospitál no negosiante sira.

Prezidente CNE, José Agostinho da Costa Belo. Imajen TATOLI/António ‘Dasiparu’ Gonçalves.

Tanba, tuir nia, iha tempu eleisaun iha posibilidade eleitór sira atu la fila ba sira-nia fatin tanba situasaun transporte no haree mós ba kestaun ekonomia, entaun lei ne’e fó solusaun atu sira bele rejistu iha Dili ne’ebé mak STAE ho CNE prepara ona hodi fasilita sira.

“Ida-ne’e ami halo atu evita asidente ne’ebé mak akontese iha períodu kotuk. Maibé ninia prosesu ne’e sei liuhosi xefe suku no reitór ensinu superiór sira iha Dili tanba estudante sira,” nia dehan.

Sentru votasaun paralelu ne’ebé sei estabelese iha Dili ne’e, inklui ona iha sentru votasaun hamutuk 1.200 iha territóriu nasionál no iha diáspora.

STAE identifika ona sentru votasaun paralelu iha fatin tolu (3) ida Dili laran mak sei stabelese sentru votasaun paralelu iha STM Becora ne’e atende eleitór parte leste, ida iha eis finansa Caicoli ne’e atende eleitór parte sentrál nian no parte oeste mak estabelese entre edisfísiu INAP no Arte Moris ne’ebé sei atende eleitór parte oeste nian.

Antes ne’e, iha loron 14 fulan-jullu tinan 2021 Prezidente Repúblika, Francisco Guterres ‘Lú Olo’, promulga ona alterasaun daneen ba Le Eleitorál ba Prezidente Repúblika, númeru 7/2006, 28 dezembru, ne’ebé hato’o hosi Parlamentu Nasionaál, liuhosi dekretu númeru 44/V.

Dekretu hosi Parlamentu Nasionál (PN) nakfilak ba Lei bainhira Prezidente Repúblika promulga no publika iha Jornál Repúblika.

Lei Eleitorál ba Prezidente Repúblika aprova iha Parlamentu Nasionál iha 28 juñu 2021 no Prezidénsia Repúblika simu iha 6 jullu 2021, Prezidente Repúblika promulga iha 12 jullu 2021 no públika iha Jornál Repúblika.

Notísia Relevante: Eleisaun prezidensiál 2022: Sentru votasaun 1200 no paralelu tolu

Alterasaun artigu 31-A (Sentru votasaun paralelu):

  1. Sentru votasaun paralelu ne’e sentraliza iha kapitál nasaun nian, destinada ba eleitór inskritu sira iha unidade jeográfika resensiamentu ne’ebé lokalizada fora hosi munisípiu Dili, ne’ebé hetan impedimentu, ho razaun médika, eskolár ka ezersísiu funsaun públika, bainhira dezloka ba lokalizasaun ne’ebé de’it iha sentru votasaun sira.
  2. Bele mós vota iha entros de votasaun paralelu iha kualkér eleitór seluk ne’ebé inskritu iha unidade jeográfika resensiamentu lokaliza fora hosi munisípiu Dili, dezde justifika impedimentu iha dezlokasaun ba lokál ne’ebé estabelese sentru votasaun.
  3. Estabelese sentru votasaun paralelu tolu, ida ba eleitór ne’ebé resensia iha munisípiu Lautém, Baucau on Viqueque, ida ba eleitór sira-ne’ebé resensia iha munisípiu Manatuto no Liquiçá, Aileu, Ermera no Postu Administrativu Ataúro, no ida ba eleitór inskritu iha munisípiu Ainaro, Bobonaro, Covalima, Manufahi no Rejiaun Administrativa Espesiál Oé-Cusse Amebeno (RAEOA).
  4. Kada sentru votasaun paralelu só bele funsiona ho mínimu rejista eleitór atus-ida.

Artigu 31-B (Inskrisaun iha sentru votasaun paralelu):

  1. Eleitór ne’ebé atu vota iha sentru votasaun paralelu, rejista ho entidade saúde, edukasaun ka Komisaun Funsaun Públika, konforme trata ema ida moras, estudante ka dosente, funsionáriu ka ajente públiku.
  2. Eleitór sira seluk, ne’ebé refere iha númeru anteriór, ne’ebé que pretende vota iha sentru votasaun paralelu, aplika hosi STAE.
  3. STAE fixa no anúnsia publikamente data inísiu no termina períodu rejistu refere iha númeru anteriór.
  4. Entidade referida iha númeru 1 haruka ba STAE kona-ba lista eleitór sira-ne’ebé rejista ona, iha loron seguinte hodi termina períodu rejistu.
  5. STAE elabora lista eleitór hosi kada sentru votasaun paralelu.
  6. Eleitór inskritu iha sentru votasaun paralelu elimina hosi lista eleitór unidade geojráfika resensiamentu iha-ne’ebé rejista.
  7. Inskrisaun iha sentru votasaun paralelu vale apenas ba eleisaun subsekuente.
  8. Governu bele, iha sede regulamentasaun, adota medida seluk kona-ba prevensaun fraude, dezignadamente inutilizasaun kartaun eleitór, hafoin ezerse direitu votu.

Notísia Relevante: Eleisaun prezidensiál 2022: Sentru votasaun 1200 no paralelu tolu

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here