Sekretáriu Estadu Juventude no Desportu (SEJD), Abrão ‘Nokosiku’ Saldanha, sesta (28/1) ne’e lansa livru Biologia (livru komplementár 10o ano de escolaridade). Imajen TATOLI/Anito Soares.

DILI, 28 janeiru 2022 (TATOLI)—Sekretáriu Estadu Juventude no Desportu (SEJD), Abrão ‘Nokosiku’ Saldanha, sesta (28/1) ne’e lansa livru Biologia (livru komplementár 10o ano de escolaridade) iha dalen portugés ne’ebé kompiladór ka manorin timor-oan sira kompila.

Notísia Relevante: Livru Manuál Rezumu Biolojia Hanesan Livru Komplementár ba Manuál Ofisiál

Livru komplementár ne’e kompila hosi profesór no profesora ne’ebé fó-hanorin matéria Bilojia ba estudante sira mak hanesan Jenina A. Marçal, João da Costa, Memensio Sequeira Freitas no Vasco Hornai.

Sekretáriu Estadu Juventude no Desportu, Abrão ‘Nokosiku’ Saldanha, hateten nia sente kontente no la lakon tempu partisipa iha lansamentu livru Bilogia ne’e, tanba haree ba mundu edukasaun no formasaun nian.

Sekretáriu Estadu Juventude no Desportu (SEJD), Abrão ‘Nokosiku’ Saldanha, sesta (28/1) ne’e lansa livru Biologia (livru komplementár 10o ano de escolaridade). Imajen TATOLI/Anito Soares.

“Ha’u sente la lakon tempu no ha’u sente manan duni esperiénsia no ha’u promete sei lori livru ne’e ba ko’alia ho Ministru no Vise-Ministru Edukasaun no ha’u orgullu liután bainhira rona profesór timor-oan sira mak hakerek no la’ós mai hosi bolseiru rai-li’ur, ida-ne’e orgullu boot liután,” Sekretáriu Estadu Juventude no Desportu ne’e hateten liuhosi ninia diskursu iha serimónia lansamentu ba livru Biologia “100 Ano de escolaridade”, iha salaun CPN Artimide Zatti (Salesiano Media Center (SMC) Comoro.

Tanba, tuir nia, siénsia iha espasu no iha ne’ebé de’it ema iha tanba iha siénsia liu-liu siénsia exata ne’ebé depende de’it metodolojia koñesimentu oinsá bele toma ida-ne’e.

Nune’e, nia husu ba Institutu Nasionál Sieénsia Teknolojia (ICT, sigla portugés) atu promove profesór sira-ne’ebé kreativu fahe sira-nia matenek liuhosi kompila ka hakerek livru.

“Nune’e, ha’u husu ba INCT atu promove profesór sira-ne’e. Se ita lakon osan ba halo viajen estrajeiru ho kustu rihun $10 no rihun $5, nusa la atribui prémiu hanesan sé mak halo revizaun manuál nia hetan rihun $2 no rihun $6, hodi nune’e profesór sira bele iha motivasaun boot liután,” nia dehan.

Iha biban ne’e, Governante ne’e lori Governu nia naran agredese no kongratula ba profesór na’in haat (4) ba inisiativa briliante no furak, hodi kompila livru Biologia-livru komplementár 10o ano de escolaridade ne’e.

Nune’e mós, aleinde kompila livru Biologia, nia enkoraja ba profesór matemátika no Fizika atu kontinua no kompleta siénsia iha Timor-Leste tanba investimentu iha siénsia no tékonolojia ne’e importante ba foinsa’e no estudante sira.

Livru Biologia (livru komplementár 10o ano de escolaridade) hakerek iha dalen portugés. Imajen/Espesiál.

“Iha ha’u-nia diskusaun partidu polítika ni’an, ha’u halo intervensaun ida espesifikamente ba siénsia atu oinsá partidu polítiku sira hanoin kona-ba siénsia. Tanba, iha momentu ne’ebá, ha’u halo referénsia ida ba ezame nasionál valór matemátika la to’o 7, ha’u preokupa hanesan joven ida, nune’, iha ha’u-nia intervansaun polítika ha’u husu Estadu tenke seriu iha ida-ne’e. Tanba, kapasidade joven no estudante sira laiha kona-ba siénsia mak Nasaun ne’e moris iha irasionalidade,” Abrão ‘Nokosiku’ Saldanha hateten.

Nia fiar katak siénsia Matematika mak indikadór maibé bainhira ema laiha ona prestasaun di’ak iha Matemátika, ema sei moris iha irasionalidade tanba siénsia ajuda ema atu rasionaliza no koñese saida mak iha sira-nia an.

Obra hosi timor-oan kreativu

Jerente Salesian Media Center (SMC), Pe. Gui do Carmo da Silva, SDB, hateten ohin loron ne’e ba dahuluk iha istória públikasaun Salesian Media Center (SMC) ne’ebé realiza lansamentu ba livru edukasaun ho titlu Biologia 100 Ano de escolaridade.

“Ita-boot sira haree iha parede oin, obra timor-oan na’in haat ba timoroan sira iha eskola sekundária. Obra ida-ne’e mai hosi inisiativa timor-oan ne’ebé kreativu no badinas, timor-oan ne’ebé laran luak hakarak atu fahe sira-nia koñesimentu ho hirak ne’ebé presiza. Nune’e, ho públikasaun ne’e, SMC ne’ebé eziste ho vizaun no misaun atu haklaken Maromak nia laran di’ak liuhosi esplorasaun matenek no arte ne’ebé Nai kuda iha ema, ohin sente onradu hodi sai parseiru ida ba hekerek-na’in sira, hodi bele públika livru Biologia ne’e,” Pe. Gui do Carmo da Silva hateten.

Profesór ka Kompiladór livru Biologia “100 Ano de escolaridade” hosi liman-karuk ba liman-kuana Memensio Sequeira Freitas (eskola 12 Novembru Becora), Jenina Alves Marcal (Eskola Finantil), João da Costa (eskola São Pedro) no Vasco Hornay (Eskola 10 Dezembru). Imajen/Espesiál.

Tanba ne’e, SMC sente orgullu ho públikasaun ba livru ne’e, tan bele sai ona kanál ida ba promosaun obra matenek-na’in timor-oan sira ba nia maluk timor-oan seluk, tanba ho publikasaun ne’e bele motiva manorin-na’in sira seluk hodi hamoris obra barak liután, nune’e bele kontinua eleva kualidade mundu edukasaun iha rai doben Timor-Leste ne’ebé ema hotu hadomi no tau laran bá.

Reprezentante Kompiladór Livru Biologia, Memensio Sequeira Freitas, hateten inisiativa kompila livru Biologia ne’e tanba difikuldade ne’ebé profesórs sira enfrenta iha atividade ensinu, nune’e mós difikuldade ne’ebé estudante sira enfrenta iha sira-nia prosesu aprendizajen durante tinan 10 nia laran.

“Tanba manuál ne’ebé ita iha emite hosi Ministériu Edukasaun hamutuk ho Universidade ne’e kapaas ona maibé iha lakuna balun ne’ebé kleur la konsege aprezenta, entaun ita lori ona tinan 10 ba implementasaun utilizasaun livru ne’e no laiha tán livru seluk. Entaun, ho inisitiava ami-nian ne’e hodi ajuda fó solusaun ruma ba defisénsia sira-ne’ebé ita iha,” nia esplika.

Nia haktuir, prosesu kompila livru Biologia ne’e hahú iha 01 juñu 2019 to’o 28 janeiru 2022 halo públikasaun, ne’ebé kompostu hosi Unidade Temátiku tolu (3) ho totál pájina hamutuk 184.

Sekretáriu Estadu Juventude no Desportu (SEJD), Abrão ‘Nokosiku’ Saldanha, hasai retratu hamutuk ho eskritór no Jerense Saelsian Media Center (SMC) Comoro. Imajen TATOLI/Anito Soares.

“Entaun, livru ne’e hanesan ho manuál ofisiál ni’an, maibé ninia deskrisaun ne’e ami buka atu koloka buat ne’ebé iha manuál ofisiál laiha, entaun ami kompleta ho manuál ne’ebé ami halo. Ne’ebé, estruturálmente ami la muda buat ida, maibé ami aumenta tan de’it buat balun ne’ebé deskrisionálmente diferensa entre livru ne’ebé ami halo ho manuál ofisiál Ministériu Edukasaun nian,” nia dehan.

Hafoin halo lansamentu ba livru ida-ne’e, nia infroma, sira-nia parte sei prepara hela livru ba 100 primeiru no segundu Ano sei iha faze elaborasaun ne’ebé kuaze atu konklui ona, no espera katak iha tinan oin (2023) bele lansa tán livru Biologi ba primeiru Ano no segundu Ano nian.

Nia informa, molok to’o iha lansamentu ba livru ne’e, sira hasoru difikuldade oioin hanesan enfrenta difikuldade ba orsamentu públikasaun nian, maibé nia hein katak ministériu relevante bele fasilita no aopia atu bele utiliza livru ne’e iha eskola sira.

“Ezemplu, Ministériu Edukasaun bele fasilita no apoia oinsá livru ne’e bele prodús hodi utiliza iha eskola sira, ha’u hanoin ida ne’e mak ami presiza loos. Difikuldade seluk mak apoia polítika no morál hosi Instituisaun sira, liu-liu Ministériu Edukasaun atu oinsá mak konsidera inisitiva sira hanesan ne’e, atu bainhira ami mosu iha sira-nia odamatan sira bele apoia netik ho liafuan no polítika ruma, atu nune’e inisiativa sira-ne’e bele dezenvolve ba oin,” nia dehan.

Entretantu, Profesór no Kompiladór livru Biologia “100 Ano de escolaridade” mak Jenina Alves Marcal hosi eskola Finantil, João da Costa hosi eskola São Pedro, Memensio Sequeira Freitas hosi eskola 12 Novembru Becora no Vasco Hornay hosi Eskola 10 Dezembru.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here