Osan Dolar Amérika. Imajen/Espesiál

DILI, 28 janeiru 2022 (TATOLI) – Diresaun Rejionál Edukasaun Juventude no Desportu, Rejiaun Administrativa Espesiál Oé-Cusse Ambeno (RAEOA), halo pagamentu direitu retroativu ba profesór na’in-437 hosi tinan fiskál 2014 to’o 2022.

Sekretária Rejionál ba Asuntu Edukasaun Solidariedade Sosiál no Inkluzaun, Avelina da Costa, informa, dadus pagamentu direitu retroativu ba profesór sira hosi 2014 to’o janeiru 2022 hamutuk na’in-457, maibé autoridade RAEOA selu de’it na’in-437 tanba na’in-20 daudaun ne’e asumi hela kargu xefia hanesan diretór eskola.

Nia fó-sai katak, pagamentu ne’e fazeadamente, faze primeiru iha 2019 autoridade halo pagamentu ba sira na’in-116 maibé na’in-20 la konsege tanba asumi hela kargu xefia, entaun pagamentu de’it ba na’in-96.

Faze daruak iha 2021 autoridade halo pagamentu ba na’in-341, nune’e totál profesór ne’ebé hetan ona sira-nia direitu retroativu hosi 2014 to’o 2021 hamutuk na’in-437.

Nia esplika pagamentu ne’e bazea ba avaliasaun dezempeñu no prosesu atu selu ne’e halo ajustamentu ho sálariu profesór hirak-ne’e.

“Ne’e la’ós autoridade mesak maka prosesa, maibé parte tékniku sira submete lista avaliasaun dezempeñu ne’e ba iha Komisaun Funsaun Públika nasionál hodi halo prosesa tuir sistema, depois haruka mai fali edukasaun Oé-Cusse, hodi submete ba Sekretária Rejionál ba Asuntu Finansas atu halo verifikasaun, depois lista ne’e sei submete ba Komisaun Funsaun Públika nasionál hodi halo aprovasaun finál hafoin halo pagamentu,” Avelina da Costa, informa ba Agência Tatoli liuhosi telefónika, sesta ne’e.

Pagamentu ne’e depende ba eskalaun ho durasaun tempu no profesór hirak-ne’e mai hosi ensinu sira hotu, komposta hosi ensinu pré-eskolár, ensinu báziku, ensinu sekundáriu jerál no ensinu sekundáriu tékniku vokasionál.

Sekretária Rejionál ba Asuntu Finansa RAEOA, Maria Eliza Maniquin, informa valór orsamentu ba pagamentu retroativu ba profesór na’in-437 hne’e amutuk $33,738.00, ne’ebé aloka hosi Orsamentu Jerál Estadu (OJE) 2021.

Iha 29 outubru 2019, Ministra Edukasaun Juventude no Desportu, Dulce de Jesus Soares  selebra nota transferénsia ho Autoridade RAEOA, atu tranfere orsamentu hosi Governu Sentrál ba profesór sira tuir progresu eskalaun, tanba lei la permite Autoridade RAEOA halo pagamentu direita hosi rejiaun nia osan.

Jornalista              : Abílio Elo Nini
Editór                    : Evaristo Soares Martins

PUBLISIDADE HUSI MTCIiklan