Diretora Mercy Corps iha Timor-Leste, Jules Keane, asina nota entendimentu ho Diretór Jerál Edukasaun Ensinu MEJD, Luís Manuel Fernandes, iha salaun Hotel Timor, sesta (28/01). Imajen TATOLI/António Gonçalves

DILI, 28 janeiru 2022 (TATOLI)—Ministériu Edukasaun Juventude no Desportu (MEJD) hamutuk ho Mercy Corps, asina nota entendimentu atu kolabora reforsa reziliénsia ambientál inklui responde ba dezastre naturál no mudansa klimátika.

Tuir Diretór Jerál Edukasaun Ensinu Ministériu Edukasaun Juventude no Desportu (MEJD), Luís Manuel, inisiativa ne’e hodi hatan ba problema jestaun lixu plástiku ne’ebé la apropriadu hodi estraga ambientál.

Diretora Mercy Corps iha Timor-Leste, Jules Keane no Diretór Jerál Edukasaun Ensinu MEJD, Luís Manuel Fernandes, troka nota entendimentu hafoin asina akordu, iha salaun Hotel Timor, sesta (28/01). Imajen TATOLI/António Gonçalves

“Atu kombate ka redús lixu plástiku iha ita-nian nasaun, presiza kolaborasaun ema hotu nian. Tanba ne’e, akordu ne’ebé ita halo ho Mercy Cops, bele loke oportunidade atu aselera programa iha tinan ne’e. Klaru asina termu referénsia ne’e importante, hodi ita hahú ona atividade, labele hein tan tinan ida ou rua tuir mai, tanba lixu plástiku bele lori impaktu negativu ba ambiente,” Diretór Jerál hateten iha Hotel Timor, sesta ne’e.

Notísia relevante: Governu prevee millaun $18 mellora jestaun lixu iha Dili

Nune’e, MEJD sei halo sensibilizasaun ba eskola hotu atu hamutuk halo esforsu ba redusaun lixu iha eskola sira.

Seremónia asina nota entendimentu entre MEJD no Mercy Corps kona-ba reforsa reziliénsia ambientál, iha salaun Hotel Timor, sesta (28/01). Imajen TATOLI/António Gonçalves

“Esforsu ne’e tenke mai hosi ema hotu iha parte edukasaun, hanesan mestre no alunu iha eskola hotu. Ministériu sei hatama iha planu atu halo kampaña ba eskola atu hotu-hotu bele hatene impaktu lixu plástiku ba ambiente,” nia akresenta.

Hafoin asina termu referénsia, sei disponibiliza meiu hosi servisu inspetivu, ne’ebé fahe ona ba eskola hotu.

“Meiu ida-ne’e atu kontrola ka haree konsiderasaun hosi eskola sira, kona-ba aplikasaun sistema redusaun lixu. Bainhira sira la kumpre no la tau konsiderasaun, maka ita sei foti medida ruma ba hahalok sira ne’e,” nia tenik.

Diretora Mercy Corps iha Timor-Leste, Jules Keane. Imajen TATOLI/António Gonçalves

Nune’e mós, Diretora Mercy Corps iha Timor-Leste, Jules Keane, konsidera labarik no joven sira maka sai xave importante hosi populasaun, atu hasa’e konsiénsia sosiedade kona-ba ambiente.

“Jestaun plástiku ne’ebé la apropriadu no risku dezastre ne’ebé aumenta tanba mudansa klimátika. Eskola nu’udar plataforma krítiku atubele dezeñu informasaun di’ak kona-ba mudansa hahalok no empodera estudante sira sai ajente ba mudansa, hahú hosi sira-nia uma laran rasik no kria advokasia ambiente ba tempu naruk,” nia tenik.

Liuhosi integrasaun ba atividade edukativu, kolaborasaun entre MEJD ho Mercy Corps sei fó tulun ba estudante sira atu dezenvolve kompeténsia no estratéjia sira ne’ebé sei kontribui hodi proteje Timor-Leste ninia beleza naturál, saúde no seguransa povu, ho preparasaun hasoru risku ba inundasaun iha área urbana no risku alterasaun klimátika.

Ho nune’e, tuir Jules Keane, kolaborasaun ne’e sei benefisia programa ne’ebé finansia hosi Ajénsia Kooperasaun Internasionál Koreia (KOICA, sigla ingés), hamenus lixu públiku ne’ebé finansia hosi Uniaun Europeia (UE) inklui programa Plastics Recycling Alliance, ne’ebé hetan finansiamentu hosi Ajénsia Estadu Unidu ba dezenvolvimentu (USAID, sigla ingés).

Intervensaun ne’e sei haree liu ba kolaborasaun sira ne’ebé envolve parte interesadu hotu, hodi enkoraja asaun koletiva ho USAID,KOICA,UE, empreza konstrusaun lokál Caltech no empreza Brewer Global Heineken, no Mercy Corps, hanesan membru aliansa solusaun plástiku mai ho parseria inovativu ne’ebé hakarak promove Timor-Leste ba situasaun naturál no hakarak limita utilizasaun plástiku.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here