Diretora Dermatolojista Hospitál Nasionál Guido Valadares (HNGV), Dulce Madalena Aberto. Imajen TATOLI/Filomeno Martins

DILI, 28 janeiru 2022 (TATOLI)— Diretora Dermatolojista Hospitál Nasionál Guido Valadares (HNGV), Dulce Madalena Aberto, informa, kada tinan rejista ema ho pozitivu moras lepra liu-30.

“Kada fulan, HNGV deteta kazu rua ka tolu, nune’e mós entre pasiente tolu ka haat mak halo tratamentu rutina iha klínika ne’e kada loron iha janeiru 2022,” Diretora ne’e afirma ba Agência TATOLI iha Bidau, Dili, sesta ne’e.

Tanba HNGV sempre ezamina sintoma moras lepra bazeia ba hena mutin iha pasiente ninia isin lolon ne’ebé mak la senti moras bainhira tuu no kulit mahar ka maran.  

Enkuantu moras lepra ne’e ejiste ho tipu rua hanesan paucibacilar no multibasilar.

Moras Lepra. imajen Google

“Lepra multibasilar ne’e perigu liu tanba halo diagnóstika ka tratamentu presiza fulan 12 ka tinan ida no ho lepra paucibacilar presiza fulan neen hala’o  tratamentu ba pasiente,” nia akresenta.

Nia dehan tuir estudu siéntifika no dadus empirika hatudu katak karik halo detensaun sedu ba moras lepra, entaun pasiente sei la hetan disabilidade. Tanba ne’e mak diagnosa ba moras lepra sedu nee sei minimiza konsekuénsia ba ema atu hetan disabilidade.

Atu prevene mora lepra mak tratamentu ne’ebé ho loloos hodi labele kauza ba inan sira ne’ebé mak sofre moras lepra sei labele kous-oan,  no  pasiente lepra hetan tratamentu mak tranzmisaun moras refere bele diminui no hapara.

“Mane iha tendénsia boot hodi hetan moras lepra tanba sira halo movimentu barak iha sira nia atividade loro-loron.  Ita halo diagnosa ba moras lepra bazeia ba situasaun klínika ka laboratóriu,” nia esplika.

Nune’e, HNGV persiza laboratáriu adekuadu atubele halo teste ba moras lepra ho própriu tanba pasiente iha maibé laiha fasilidade adekuadu defisil atu deteta no fó tratamentu.

“Dalaruma, ita nia pasiente iha sintoma lepra, maibé ita nia laboratoriu ladun adekuadu hodi deteta kedas batéria lepra. Tanba nee mak ita persiza laboratoriu adekuadu atu fasilita dout’or sira nia serbisu,” direjente ne’e rekomenda.

Nia hatutan, bainhira mak laiha aimoruk anti-leprosy medicine iha ospitál mak sei fo impaktu negativu ba pasiente ne’ebé mak halo tratamentu ba moras lepra.

Iha fulan fevereiru no junu 2021, HNGV laiha aimoruk ba moras lepra no ikus mai kauza ba pasiente 12 mak la kompleta sira nia tratamentu no hetan impaktu negativu hanesan reasaun negativu lepra. 

“Moras lepra ne’e la’ós buat foun ida, ne’ebé aimoruk ne’e ita tenke prepara hela de’it.  Tanba Covid-19 la’ós razaun ba ita, moras lepra ne’e iha Timor kle’ur ona no ita tenke prepara ba ida ne’e,” Diretora ne’e sujere.

Iha tinan 2021, HNGV rejista kazu lepra 33, hosi númeru ne’e inklui labaraik na’in-rua. Kazu 33 refere kompostu husi mane 22 no feto 11.

“Iha tinan kotuk, ita iha maluk 12 mak la komplete sira nia tratamentu médiku tanba aimoruk ba moras lepra iha ospitál hotu. Ita so iha de’it pasiente ida mak komplete ninia tratamentu mediku inklui na’in-ida mate,” nia afirma.

Entretantu, iha tinan 2020, HNGV rejista kazu lepra hamutuk 31, kompostu hosi mane 15 no feto 12, inklui labaraik nain tolu. Hosi kazu nee, pasiente nain rua mak la halo kompleta sira nia tratamentu médiku no pasiente haat mak kompleta sira ninia tratamentu médiku.

Notísia relevante:Aban, MS selebra loron mundiál lepra iha Bobonaro

Jornalista: Filomeno Martins

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here