Diretór Ezekutivu IADE, Filomeno Marcelino no Diretór Mary Mackillop Today, Alipio Baltazar asina nota entendementu, iha edifísiu Becora, sesta (28/01). Imajen TATOLI/Egas Cristóvão

DILI, 28 janeiru 2022 (TATOLI)–Institutu Apoia Dezenvolvimentu Emprezariál (IADE) no Organizasaun Naun Govermentál (ONG) Mary Mickillop Today (MMT), selebra akordu hodi kapasita membru kooperativa sira iha área negósiu.

Diretór Ezekutivu IADE, Filomeno Marcelino Belo. Imajen TATOLI/Egas Cristóvão

“Parte rua asina akordu ho objetivu fó asieténsia téknika ba emprezáriu sira, liliu ba hirak ne’ebé envolve-an iha grupu iha Ermera, atu fó formasaun no kapasitasaun emprezariál iha tipu báziku, nune’e hafoin halo avaliasaun mak bele espande tan formasaun,” Diretór Ezekutivu IADE, Filomeno Marcelino, hateten, iha ámbitu selebrasaun akordu iha edifísiu Mary Mickillop Today, Becora, sesta ne’e.

Notísia relevante: Mary Mackillop Today Entrega Pakote Materiál Saúde ba Suku Bazartete

Diretór IADE, Filomeno Marcelino no Diretór Mary Mackillop Today, Alipio Baltazar troka nota entendementu, iha edifísiu Becora, sesta (28/01). Imajen TATOLI/Egas Cristóvão

Apoia ne’ebé IADE fó iha tipu rua hanesan jogu fila-liman hanesan formasaun ba sira ne’ebé la hatene lee no hakerek, maibé hakarak halo negósiu no hahú halo negósiu, aleinde  formasaun akuntabilidade.

“Bainhira halo avaliasaun no hetan rezultadu di’ak mak sira merese hetan apoia direta hosi IADE. Kooperasaun ne’e buat ketak ida, maibé IADE nia tulun mós buat ketak ida, ezemplu maka sira-nia negósiu la’o ona, maibé publikasaun sira laiha entaun bele apoia kuadru ba sira ka halo ligasaun ba sira-nia negósiu ho negósiu, hosi fatin seluk ka apoia ekipamentu bainhira kooperasaun la’o di’ak ona asisténsia seluk bele fó direta,” Diretór kompromete.

Diretór Mary Mackillop, Alipio Baltazar. Imajen TATOLI/Egas Cristóvão

Iha biban hanesan, Diretór Mary Mackillop Today, Alipio Baltazar, konsidera formasaun ne’e importante tebes atu mellora liután kapasidade membru kooperativa sira.

“Formasaun ne’e sei fó ba grupu feto no agrikultura baunilla, hanesan grupu ida iha Railaco kraik, ba membru feto hamutuk 48, maibé sai ona kooperativa iha tinan 2020. Sira agora membru besik ona 80, ne’ebé liuhosi selebrasaun akordu kooperasaun ne’e atu kapasita nível téknika ligadu ba emprezariál,” nia akrsenta.

Ekipa IADE no Mary Mickillop Today, hasai foto hamutuk hafoin asina akordu kooperasaun, iha edifísiu Becora, sesta (28/01). Imajen TATOLI/Egas Cristóvão

MMT hanesan organizasaun internasionál ne’ebé serbisu iha Timor-Leste hahú iha tinan 1994 to’o agora, ne’ebé hala’o ona programa foka ba hasa’e kapasitasaun mestre no mestra, inklui parente hanesan inan-aman sira liuhosi programa hanesan literasia tetun, literasia saúde, programa parente, sentru aprendizajen movel inklui mós programa subsisténsia ne’ebé mak implementa iha Dili, Liquiçá, Ermera, Manufahi no Viqueque.

ONG ne’e ninia programa subsisténsia ba kooperativa uniaun BEHAFU, hahú implementa iha tinan 2015, hosi Kongregasaun Christian Brothers iha munisípiu Ermera, postu Administrativu Railaco, suku Railaco Kraik.

Aleinde ne’e, atividade kooperativa uniaun BEHAFU foka ba atividade rai no empresta osan, ne’ebé daudaun Kooperativa ne’e iha ona membru hamutuk 70.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here