Diretór Nasionál Ensinu Rekorrente MEJD, José Artur Viana. Imajen TATOLI/Nelia Fernandes

DILI, 27 janeiru 2022 (TATOLI)—Hahú estabelesementu Diresaun Nasionál Ensinu Rekorrente iha Ministériu Edukasaun Juventude no Desportu (MEJD) iha tinan 2015, to’o tinan 2021 rejista estudante ensinu rekorrente hamutuk 1.145.

“Iha tinan 2016 to’o 2020, ita iha totál estudante 800, hafoin tama tinan 2021 aumenta tan 345, nune’e sai 1.145. Bazeia ba rezultadu ezame, kuaze estudante 200-resin maka kontinua ba ensinu sekundáriu jerál tékniku vokasionál, tanba sira-nia idade kiik, maibé na’in 600-resin maka hein hela atu tama ba ekivalénsia sekundáriu jerál tanba idade avansadu ona,” Diretór Nasionál Ensinu Rekorrente MEJD, José Artur Viana, informa ba Agência TATOLI, iha salaun SKB, Villa verde, sesta ne’e.

Notísia relevante: MEJD halo preparasaun elabora kurríkulu rekorrente ensinu sekundáriu

Tanba ne’e, Diretór Nasionál Ensinu Rekorrente konsidera presiza elaborasaun kurríkulu ensinu rekorrente ba nível sekundáriu, maibé tinan ne’e seidauk bele realiza tanba laiha fundu atu rekruta péritu no tékniku sira.

“Iha tinan 2019, Diresaun Nasionál Ensinu Rekorrente iha ona ekipa pedagojia hamutuk na’in-10 resin, ne’ebé rekruta iha tinan 2014 hodi halo elaborasaun ba kurríkulu ensinu rekorrente terseiru siklu. Ema sira ne’e iha ona esperiénsia, maibé tanba desizaun polítika, Govern hapara ekipa ne’e ho razaun kontratadu, ne’ebé agora diresaun iha de’it ema na’in-rua,” nia akresenta.

Iha sorin seluk, parte diresaun hakarak mantein ekipa ne’e hodi kontinua elabora fali esbosu ba kurriíkulu ensinu rekorrente ba nível sekundáriu jerál.

“Ha’u triste tanba ema sira ne’ebé ita rekruta mai ho kualidade no ita forma sira hodi halo duni serbisu ba futuru edukasaun, maibé ema seluk hapara tiha. Ema sira ne’e preparadu tanba asesór ida hosi Brazíl mak forma sira hodi prepara halo elaborasaun ba kurríkulu,” nia tenik.

Agora bainhira parte diresaun husu apoia hosi Unidade Kurríkulu Nasionál, maibé sira okupadu ho kurrikulu formál.

“Governu bele buka dalan hodi husu apoiu ba parseiru dezenvolvimentu sira, hodi hetan netik fundu atubele hahú planu elaborasaun kurríkulu. Tanba atu elabora kurríkulu ne’e la difísil, problema mak laiha osan atu halo rekrutamentu ne’e,” Diretór ne’e dehan.

Nia mós nota katak MEJD seidauk tau prioridade ba programa ne’e, maibé haree liu ba eskola formál sira.

“Tanba ne’e sira seidauk prevee orsamentu ba programa elaborasaun kurríkulu ba ensinu rekorrente nível sekundáriu,” nia realsa.

Fundu ne’ebé maka DNER prevee ona iha tinan 2021 atu elabora kurríkulu hamutuk $200.000, maibé la konsege realiza tanba kondisaun pandemia iha tinan rua ikus, ne’ebé halo planu no programa hotu sai paradu, enkuantu iha tinan 2022 la prevee orsamentu ba programa ne’e.

Tuir nia, bainhira orsamentu prevee duni, parte diresaun sei uza atu halo rekrutamentu ba péritu balun tantu nasionál ka internasionál hodi prepara kurríkulu ba estudante sira ne’ebé abandona eskola iha nível sekundáriu, hanesan halo ona ba estudante nível ensinu báziku siklu 1,2,3, nune’e estudante sira hetan diploma hanesan estudante seluk iha eskola formál.

“Dalan atu hetan apoiu ne’e barak, bainhira ministériu iha vontade bele hetan apoiu hosi doadór sira, naran iha kooperasaun di’ak ho ajénsia dezenvolvimentu sira hodi bele hetan apoiu hodi alkansa programa elaborasaun kurríkulu,” nia otimista.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here